Nunavimmi qinersisoqarpoq
Makivik Corporationip Nunavimmi aningaasarsiorneq, inunnik isumaginninneq politikkikkullu naalakkersuineq suliaraa. Naak Makivik pisortatigoortumik naalakkersuisuunngikkaluartoq, Nunavimmi naalakkersuinertut nalilerneqarsinnaasunik ingerlataqarpoq, præsidentissaanillu qinersineq taamaammat pissanngatigineqarsimalluni.
Jobie Tukkiapiup qineqqusaarutaa paatsuugassaanngilaq: Suliat aallartinnikuusakka naammassiniarpakka, Tukkiapik qineqqusaarnerup nalaani ilaatigut oqarpoq.
Jobie Tukkiapillu ulapissimaqaaq. Præsidentitut ukiuni siullerni marlunni sulinermini Nunavimmi aatsitassarsiornermut pilersaaruteqartoqarnissaa piviusunngortissimavaa, aatsitassat uranitalinnik akoqannginnissaat sulissutigisimallugu.
Nunaviup namminersornerulersinnaanera oqallisigineqaqqilerpoq
Nunaviup namminersornerulernissaanut oqallinneq taassuma aamma aallarteqqissimavaa.
Namminersornerulernerup Nunavimmi eqqunneqarnissaa pillugu pilersaarut ukiualunnguit matuma siornatigut taasissutigineqarmat amerlanerussuteqartunit itigartinneqarpoq.
Aatsitassaqarnerulli sutigut tamatigut ineriartortinneqarnissaa, Quebecimi nunap immikkoortuani naalakkersuisut siunniummassuk, Nunaviup namminersornerulersinnaanissaa oqallisigineqaqqilerpoq. Pilersaarut "Plan Nord"-imik taaguutilik, avannaanut pilersaarut, naapertorlugu tamanna piviusunngortinniarneqalerpoq, tassa Quebecip avannarpasissuani aatsitassalerinerup ineriartortinneqarnissaa matumani pineqarluni. Pilersaarutilli tamakku Makivimmit apeqquserneqarput.
Nunaviup namminersornerulersinnaanissaa pillugu apeqqut, Nunavimmi nunaqarfinni illoqarfinnilu katillugit 14-iusuni maanna tusarniaassutigineqalerpoq, Jobie Tukkiapik tusarniaanermi siuttuulluni.
Parnasimautik, tassa tusarniaanerup taaguutaa, eqqartuussiveqarneq, ineqarneq, kultureqarneq oqaatsillu atukkat pillugu Nunavimmi siunissami namminersornerulertoqassappat pilersaarutit oqallisigineqarlutik.
Nunavimmi qinersisoqarnerani ajugaanini, Namminersornerunerup Nunavimmi eqqunneqarnissaanut piginnaatitsissummik tunineqarnermisut, Jobie Tukkiapiup isigaa, tamannalu anguniarlugu Makivik Corporationip sulinerata nanginneqarsinnaaneranik isumaqartillugu.
