Nunavimmi qajartorujussuarneq
Nunavimmeersut angutit arfinillit qaammatip ataatsip ingerlanerani qajartorlutik Nunaviup nunaqarfiinut ingerlaaqattaarsimasut oqaatigineqarpoq. Taama sivisuumik ingerlaarnermi isumaavoq, Nunavimmi inuusuttut akornanni imminortarnerup akiorniarneqarnissaa.
Suliniut taaguuteqartinneqarpoq Living Life Projekt, tassa kalaallisuunngortissagutsigu ”Inuuneq inuuneriuk” taamatut nutserneqarsinnaagunarpoq. Nunaqarfinniit nunaqarfinnut qaannamik ingerlaarnermi inuunerup naleqassusaa paasisitsissutiginiarneqarpoq, taamaalillugit inuusuttut inuunerup peqqissuunissaanik kajumissaarneqarsinnaaqqullugit. Taamatuttaaq qaannamik ingerlaarnermi oqariartuutigineqarpoq, inoqarmat ajornartoornerup pisariaqarfiini ikiuukkusuttartunik. Taamaaliornikkut neriuutigineqarluni inuusuttut imminornissaraluinik pinngitsuuisoqarsinnaanissaa.
Ingerlaarnerli sumiiffinni silap ajortaqattaarnera pissutigalugu pilersaarutaasumiit sivisunerusimasoq oqaatigineqarpoq.
Qajartoqataasoq Eli Qumak Akulivimmeersoq oqaluttuarsimanerpaat, ingerlaarneq tamaviaarnangaarmat mallerpallaalertillugu tunniutiinnangajattarsimalluni, - oqariartuutigineqartorligooq eqqaallugulu tunniutiinnarusukkunnaartarsimavoq.
Taamatut qajartortitsineq aatsaat siullermiilinngilaq, siullermik siorna Kuujjuaraapimmiit Akulivimmut aamma qajartortitsisoqarpoq. Aappagu aamma Ungavaap kangerliumarngani qajartortitsisoqassasoq pilersaarutaavoq.
