Nunavimmi nunaqarfinni inuuniarneq akikinnerulerpoq
Nunavimmi nerisassat illoqarfissuarnut sanilliullugit marloriaammik imaluunniit pingasoriaammik akisunerusarput, taamaattorli 2007-imili Makiviup Quebecimi Canadamilu naalakkersuisut suleqatigalugit nerisassaannaanngitsut akii, aammali benziinap akia aamma Nunavimmi angalaniarnerup akisunerujussua, apparsimaartinniarsimavaat.
Timmisartukkut assartuineq tapiiffigineqangaatsiartarpoq,
taamaalilluni nerisassat akii apparsarneqarsinnaaniassammata. Makiviup suliniuteqarneratigut Quebecimi naalakkersuisut, 60 millionit koruuninik aningaasaliipput, taamaalilluni nerisassanik assartuinermut akit kisimik apparsarneqaratik, aammali Nunavimmiut akikinnerusumik angalasinnaanissaat anguneqarsinnaaniassammat.
Tamatuma saniatigut Makivik 3 millionit koruuninik aningaasaliiniarpoq, taamaalilluni nunaqarfinni tamani mersortarfeeqqamik aamma biilinik motoorinillu iluarsaasasrfinnik pilersitsisoqarsinnaaniassammat, taamaalilluni nunaqarfimmiut aningaasartuutaat minnerulersinneqarsinnaassammata, immaqalu aningaasarsiulaarlutik.
Akinik apparsaaniarneq tamanna ukiut marluk matuma siornagulli aallartinneqarpoq, tamannalu siuariaataasimaqaaq. Maanna Makivimmit, Canadami aamma Quebecimi naalakkersuisui peqatigalugit ataatsimiititaliamik pilersitsisoqarpoq, akinik allatigut apparsaasoqarsinnaaneranik misissuisussamik, taamaalilluni Nunavimmiut inuuniarnerat akikinnerulerniassammat.
