Nunavimmi meeqqat malinnaavigineqarput

Nunavimmiut angajoqqaat uumasunik miluumasunik, immami mingutsitsinerup kingorna kemikaalianik akoqalersimasunik, nerisaqartarnerisa kingorna meerartaasa tamanna ajoqutigisimaneraat paasiniarlugu Quebec-imi universiteti aningaasanik 1,1 million dollarsinik pissarsivoq
Allattoq Apollo Jeremiassen
juulip 22-at 2011 08:29

Ilisimatuut paasiniaalernerannut pissutaavoq, Nunavimmi meeqqat arlallit ilinniarniarnermikkut isimikkullu ajoquteqartarneri angajoqqaat mingutsitanik miluumasunik nerisaqartarsimanerannik pissuteqartarsimammat.

1990-ikkut aallartinneranili meeqqat inunngorlaat 483-it ilisimatuunit malinnaavigineqarsimapput. Meeqqat aaversittarneranni takuneqarsinnaasimavoq taakku PCB-mik ulorianartumik aamma methylmercury-mik aavi akoqartarsimasut.

Methylmercury tassaavoq avatangiisini kemikaalia, taannalu ilisimaneqareerpoq naartuut mikisuaraaneranniit innarliisinnaasutut aammalu meeqqat inooreerneranni innarliisinnaalluni.

PCB ilaatigut atorneqartarpoq illuliani betonimut akugitinneqartarluni, taannalu avatangiisiniileraagami uumasuni, soorlu qilalukkani puisinilu nassaassaalersarluni, taakkulu inunnik nerineqaraagamik akuutissaq ulorianartoq inummiilersarpoq.

Meeqqat misissorneqartut aavini takuneqarsinnaasimavoq, taakku meeqqanut allanut naleqqiullutik aavini PCB sisamariaammik annertunerujussuusoq, methylmercury-lu aaviniittoq 20-riaammik annertunerulluni.

Kemikaaliat taakku inuup sianiutai sunnertarpaat taamatullu timaat sunnerneqartarluni, ilisimatuut taama paasissutissiipput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq