Nunavimmi meeqqat inuusuttullu ikiorniarneqalerput
Taama pisoqarpoq, ukiut marluk matuma siornagut Nunavimmi inooqatigiinnikkut atukkat pillugit nalunaarusiaq nakeriallarnartoq saqqummiunneqareersorlu.
- Taamaattumik sapaatip akunnerisa marluk matuma siornagut Quebecimi ministerit marluk Kuujjuarmut tikipput, oqaatigalugulu aningaasarpassuarnik aningaasaliisoqarsimasoq. Maannalu paasinarsivoq 175 millionit koruuninik aningaasaliisoqarsimasoq.
Nunavimmi innuttaasut 10.000-it missaanniittut affaasa missaat tassaapput meeqqat inuusuttullu. Taamaalilluni meeqqamut imaluunniit inuusuttumut ataatsimut aningaasaliissutit 35 imaluunniit 40.000 koruunit missaanniipput.
Aningaasarpassuit taakkua ilaat ataqatigiinnermik aaqqissuussinermut atorneqassapput, tassa isumaginninnermi siunnersortit allallu meeqqanik sullissisussat inissaannik allaffissaannillu sanaartornernut atorneqassallutik.
Tamatumunnga peqatigitillugu suliniummik aallartitsisoqassaaq, taamaalilluni isumaginninnermi siunnersortit Canadap kujasinnerusuaneersut isumaginninnermi siunnersortinik Nunavimmeersunik suleqateqartussanngorlugit, taamaalillutik ilisimasaminnik paarlaateqatigiissinnaaniassammata.
Aningaasarpassuit taakku saniatigut inunnik isumaginnittut, tarnip pissusiinik ilisimasallit allallu Nunavimmi meeqqat inuusuttullu atugaannik pitsanngorsaaniarlutik suliaqartut akissarsiaannut atorneqartussanik immikkut aningaasaliisoqassaaq.
