Nunattta karsia pisarnertut ingerlaqqippoq

Naalakkersuisut iluarsaaqqinnissamik ilimasaarutaat taamanikkussaq ersarinnerulersimassapput. Akileraartarnermut atugarissaarnermullu ataatsimititaliap isumaliutissiissutissaata immikkoortua siulleq piareersimassaaq. Nunap immikkoortuini ineriartortitsinissamut periusissanut nalunaarusiaq takkuteriissaaq. Angallanneq pillugu ataatsimiititaliaq suligasuartoq nalunaaruteqariissaaq. Aalisarneq pillugu inatsisissaq saqqummiunneqariissaaq. Aamma isumaginninermi atukkat ilaat allanngortiterneqassapput.

Kisianni tamakku tamarmik aappaagu suliarineqassapput, 2011-imut aningaasanut inatsimmi ilaatiguinnaq malunniutissallutik.

Aappaagumut aningasanut inatsit, Inatsisartut oqalliseqalutik tallimanngormat naammassivaat. Inatsit Nunatta Karsianik, milliardit affaat atorlugit Royal Greenlandimik annaassiniaanikkut akunnattooqqasumik, makitsitsiniartussaasutut oqaatigisariaqarpoq.

Illuatungiliuttut oqarluartaarlutik akerliugaluartut, naalakkersuisooqatigiit amerlanerussuteqarlutik Nunatta Karsiata imaarutivinnginnissaa qulakkeerniarpaat.

Namminersorneq isumalluarfiulluni, aningaasanik atuiffiulluni aallartissartoq illuatungiliutttut isumaqartut, Naalakkersuisut isumaqarput, namminersornerup isumaa piviusunngortinniarlugu aningaasassaqalernissaaq anguniartariaqartoq.

Taamakkaluartorli sanngiinnerusut atugarissaarnerulernissaannut aningaasassaqarpoq. Peqqinnissaqarfimmi utaqqisut ikilisarnissaannut aningaasaliissutit ilaneqarput. Innarluutilinnut aningaasaliissutit amerlipput, isumaginninermi aningaasaliissutit 25 millioni koruuninik ilapput. Nunaqarfinni inerisaanissamut aammalu tusagassiutit inerisarnissaannut aningaasaliisoqarpoq. Taavalu siusinaarluni pensionisiallit utoqqalinersiutillillu aappaagu juulip aallaqqaataani qaffaaffigineqalaassallutik.

Tamakku tamaasa akissaqartinniarlugit, ingerlatsinermi aningaasartuutit ikilisarneqassapput. Aamma kommunit nutaat sisamat 36 millionit koruuninik sipaarfineqarput. Aalisartut akuersissutinut akiliisalissapput. Raajanut akitsuut qaffanneqarpoq. Kiisalu aalisarnermut nakkutilliisoqarnermut atuisut akiliuteqalissallutik.

Aappaagumut aningaasanut inatsisissatut siunnersuutip saqqummiunneqaqqaarneranit naammassillugu taasinissap tungaanut allannguutissatut siunnersuutit 300-ngajaat suliarineqarput.