Nunatta Århusimi isumaqatigiissut atsiussavaa?

Århusimi isumaqatigiissut nunarpaalussuarnit, ilagalugu Danmark, atsiorneqarnikuuvoq avatangiisinut tunngassuteqartut tungaasigut paasissutissanik pissarsiniarsinnaatitaanermut, aalajangiiniarnerni innuttaasut peqataasinnaatitaanerannut maalaaruteqarsinnaanermullu tunngassuteqartoq.

-Partiit Inatsisartuni sinniisuutitaqartut tamarmik isumaqatigiipput avatangiisit inuillu peqqissusiat isumagalugit aatsitassarsiortoqassasoq, taamatuttaaq partiit tamarmik isumaqatigiippasipput suliniutit aalajangersimasut aallartinnginnerini ammasumik peqataatitsillunilu aalajangiiniartoqartassasoq. Taamaammat pissusissamisuussaaq Århusimi isumaqatigiissut Kalaallit Nunaannut atortuulersinneqassappat avatangiisinut aalajangiiniarnernilu peqataanermut atatillugu  innuttaasut Inatsisartullu taamaasillugit inatsisitigut toqqammavissarsisinneqassammata, Olsvig § 37 naapertorlugu apeqquteqaatini taama tunngavilersorpaa.