Nunatta uumasui nuttartuartut pillugit nittartagaq nutaaq
Taakku ilagaat qilalugaq qernertaq, meterinik 2000-inik itissusilimmut aqqarsinnaasoq aammalu imeqqutaallat ukiut tamaasa kilometerinik 71.000-inik isorartutigisumut ingerlaartartut.
Teknikki nutaaq iluaqutigalugu uumasut ingerlaartarnerisa misissuiffiginissaat ilisimatuunut ajornannginnerulersimavoq.
Assersuutigalugu qilalukkat qernertat nassitsissutilersornerisigut sumut ingerlaartarnerat, qanoq ititigisumut aqqartarnerat qanorlu akulikitsigisumik nerisarnerat paasisaqarfigineqarpoq.
- Qaammataasakkut nassitsissutit, dataloggerit nassitsissutillu elektroniskiusut amerliartuinnartut atorlugit paasissutissanik pissarsiarisinnaasagut alutornartupilussuupput, Aarhus Universitetimi Pinngortitaleriffimmilu misissuisuuneq Flemming Ravn Merkel taama oqarpoq.
Nittartagaq nutaaq Aarhus Universitetip, Pinngortitaleriffiup Namminersorlutillu Oqartussat suleqatigiissutigalugu pilersitaraat.
Uumasut ikitsuinnaagallartut nittartakkami allaaserineqarput, annertusarneqarnissaali pilersaarutaasoq, Pinngortitaleriffik ilisimatitsivoq.