Nunatta sermersua allanngoriartupiloorpoq
Silap pissusaata allanngoriartornera pissutaalluni nunatta sermersua allanngoriartupiloorpoq.
Ilaatigut silap kiatsikkiartornera, immap kissassusaata allanngornera, sermersuarmiillu erngup kuunnerulersimanera iigartartut sukkatsissimanerinik kinguneqarput. Nittartakkamut natur.gl-imut ilisimatuut taama allapput.
- Silap pissusaata allanngoriartorneranut sermit iigartartut sunnigaasimaqaat, tamanna misissuinitta ersersippaa, pisunullu aallaaviusunik arlalinnik tikkuaasinnaalersugut misissuinitta ersersippaattaaq. Tassa misissuinerit ataasiakkaat ataatsimoortinnerisigut paasinninnitsinnut annertusaataasimavoq, Mads Hvid Ribergaard, Nuummi Nunatta silap pissusaanik misissuivianeersoq taama oqaluttuarpoq.
Misissuinerit inerneri naapertorlugit ukiuni kingullerniinnaanngitsoq, sermeq aakkiartupiluulertarsimavoq.
1930-kkut qiteqqunneranni 1940-kkunnilu iigartartut aakkiartupiloorsimaqaat. Taamani sila aamma kiassimavoq, immallu itinerusumi kiassusaa nalinginnarmit qaffasinnerusimalluni immallu sikua aamma saannerusimavoq.