Partiit arfineq-marluk, apeqqutit marluk: Nunatta Qitornai
Nunatsinni suna unammillernarnerpaanersoq siulittaasumut, Vittus Qujaukitsumut apeqqutigaarput imalu akivoq:
- Inuuniarnikkut atukkat ilungersunarnerannut akit qaffasissorujussuupput, uuliallu akiata qaffasinnerata malitsigisaanik, innaallagissamut, imermut kiassarnermut, assartuinermut, angallannermut, nioqqutissanut, ineqarnermullu akit qaffasissorujussuupput, taamaattumik akinik apparsaaneq ukkatarineqartariaqarpoq, taamaaliornikkut Nunatsinni inuuniarneq oqilisaanneqassaaq.
Taassuma saniatigut kommuunit iluarsartuunneqarnerannut - kommuunitoqqanut utertitsisariaqarpugut, atukkat naligiinnerusunngortillugit. Minnerunngitsumillu Nunatta oqartussaaffiisa annertusaaffigineranni oqartussaaffinnik tigooraarnissarput - namminiileriartornermimi tamanna pingaaruteqarpoq.
KNR-ip qinersinissatta tungaanut apeqqutit marluk partiinut akeqquniarpai:
Nunatsinni ajornartorsiutit annersaat suua?
Qanoq aaqqinniarpisiuk?
Partiit akissutaat KNR-ip qinersinissaq pillugu quppernerani #IQ2018-imi atuarsinnaavatit.
Taava Nunatta Qitornaannit qanoq iliuuseqarfiginiarpisiuk?
- Uuliap akiata appartinneqarnissaanut Polaroil KNI-p suliffeqarfissuanit immikkoortinneqartariaqalerpoq, iluanaaruteqarfiunngitsumik ikummatissanik pilersuineq inissikkumallugu, taamaasilluta akinut iluaqutaanissaa inuiaqatigiinnullu appasinnerpaamik aqqutissiuukkumallugu, Vittus Qujaukitsoq oqarpoq.
