Kalaallit siunissami OL-imut peqataasalissanersut Kalaallit Nunaanni timersoqatigiiffiit kattuffiata GIF-ip, kiisalu Danmarkimi timersoqatigiiffiit kattuffiata DIK-p ataatsimiissutigeqqammerpaat.
Ataatsimiinnermi qanoq angusaqartoqarsimanersoq Kalaallit Nunaanni timersoqatigiit kattuffiata siulittaasua Nuka Kleemann aperaarput.
- Isumaqatigiissutigivarput DIF-imi GIF-imilu siulersuisut suleqatigiillutik siunnersuusiussasut Danmarks Olympiske komité-mi ilaasortat oktobarip aallartinnerani ataatsimeersuarnissaanni saqqummiussassaminnik nunatta OL-mut pitsaanerusumik periarfissaqalernissaa anguniarlugu, Nuka Kleemann oqarpoq.
Taanna erseqqissaavoq ataatsimiinneq isumaqatigiittumik ingerlasimasoq.
Nuka Kleemann aperaarput siunissami kalaallit OL-imi peqataasalernissaat neriunartoqalernersoq.
- Aap, neriunartoqarpoq. Ukua immikkut isigineqanngikkaluarlutik kisianni Danmarks Olympiske komite-p OL-imi peqataasussanut piumasaqaatai qaffasissorujussuit nunatsinneersunit affaannarmut pisinneqarnissaannik isuma ammatinneqarpoq, Nuka Kleemann oqarpoq.
Erseqqissaatigaali ataatsimiinnermi erseqqissaatigineqarsimasoq oktobarimi ataatsimeersuarnermi aatsaat saqqummiunneqareerpat iluamik isummerfigineqassasoq, Nuka Kleemann oqarpoq.