Nunanut allanut nioqquteqarnermi siunnersuisoqatigeeqalernissaq taperserneqartoq
Apriilip sisamaat 2019, nal. 8 20 naqqitaq:
Siunnersuut Partii Naleqqap tapersersoraa siullermik allaqqagaluarpoq. Kisianni taamaanngilaq. Kukkuneq ajuusaarutigaarput.
Nunarput nunanut allanut nioqquteqaraangami aalisakkat tunisarinerpaasarpai. Politikerinilli kissaatigineqarpoq siunissami aalisarnerup pingaaruteqarnerpaanera ilaatigut takornariaqarnermit aatsitassarsiornermillu pingaarutimigut anguneqassasoq.
Taamaattumik Siumumeersoq Karl-Kristian Kruse siunnersuisoqatigiinnik nutaanik pilersitsinissamut siunnersuuteqarpoq, taakkulu nunatta nunanut allanut nioqquteqarnissaa sammissavaat.
Nunatta nunanut allanut nioqquteqarnera pillugu siuinnersuisoqatigiit arlaannaannulluunniit attuumassuteqaratik Naalakkersuisunut misissuisarlutillu innersuussuteqartassapput.
Inatsisartuni ullormut oqaluuserineqarnermini nunanut allanut nioqquteqartarneq pillugu siunnersuisoqatigeeqalernissamik siunnersuut Inuit Ataqatigiinnit, Atassummit, Nunatta Qitornaaniit aamma Suleqatigiissitsisut Partiiannit taperserneqarpoq.
Karl-Kristian Kruse neriuppoq siunnersuisoqatigiit namminersortut nunanut allanut tunisinerat annertunerulersissinnaassagaat.
- Assersuutigalugu ukiuni makkunani nunatsinni aallarnissaasut ingerlatsiviillu tunisassianik nutaanik pilersitsinikuupput, soorlu atisaliortut nunatsinni nioqquteqarfimmi iluatsilluartut, aamma immiorfiit nutaat, taakkulu immiaaraliaat nunanut allanut tunisassiarissallugit naleqqulluarput, Inatsisartunut aalajangiussassatut siunnersuummini Karl-Kristian Kruse allappoq.
Politikerip Siumumeersup aamma takornarialerineq siunnersuisoqatigiinnit iluaquserneqarsinnasutut isigaa.
Naalakkersuisunut tapersersuisut Demokraatit siunnersuut tapersinngilaat, nunanut allanut nioqquteqarnermut siunnersuisoqatigeeqarnissaq pisariaqarsorinnginnamikku.
Partiip ilaatigut innersuussutigaa Visit Greenland siunnersuisoqatiinngortussat taakku takornariaqarnerup siuarsarnissaanut suliassat ilaannik tiguminnereermat. Aamma Partii Naleqqap siunnersuut taperseersunngilaat.
Karl-Kristian Krusep siunnersuutaa naapertorlugu nunanut allanut nioquteqarnermut siunnersuisoqatigiit pilersinnissaat 125.000 koruuninik akeqassaaq, siunnersuisoqatigiillu ingerlanneqarnerat siunissami ukiumut en million koruuninik akeqassalluni. Siunnersuut naapertorlugu susassaqarfiit allat aningaasatigut milliliiffigineqarnerannit aningaasat pineqassapput.
