Nunatta namminerisaminik aningaasaqalernissaa suli

Folketingip nunarput pillugu ataatsimiititaliaata innersuussutigaa nunatta namminerisaminik aningaasaqalernissaanik siunnersuut nunatsinni oqaluusereqqinneqassasoq. Innersuussut saqqummiunneqarpoq ullormi naalakkersuisut siulittaasuata Hans Enoksenip Danmarkimi Nationalbankimik ataatsimeeqateqarnerata nalaani. Ataatsimiinnermi tassani aningaaseriviup aningaasat isikkussaattut siunnersuusiartik sumut killinnersoq saqqummiuppaat.

Kalaallit aningaasaqalissanersut suli aalajangiiffigineqanngilaq. Inatsisissatut siunnersuut Folketingip nunarput pillugu ataatsimiititaliaani ullumi oqaluuserineqarpoq, tassani aalajangiunneqarpoq siunnersuut nunatsinni naalakkersuisunut utertinneqassasoq apeqqutigineqarluni nunatta namminerisaminik aningaasaqalernissaa isumassarsiatsialaanersoq. Tassami ataatsimiititaliami amerlanerussuteqartut isumaqalersimapput siunnersuut isumassarsiatsialaanngitsoq.

Folketingimut ilaasortat nunatsinni naalakkersuisut aperineqaqqinnissaannik isummereeraluartut, suliassaq atorfilittanit ingerlatiinnarneqarpoq. Tassami aningaasat aappaagu atuutilernissaat pilersaarutaammat. Taamaattumik naalakkersuisut siulittaasuat Hans Enoksen atorfilittaalu ullumi Nationalbankip pisortaanik Torben Nielsenimik ataatsimeeqateqarput. Ataatsimiinnermi aningaasassatut siunnersuutit naqitat siulliit Naja Abelsenimit titartarneqarsimasut takutinneqarput. Namminersornerullutik Oqartussat pisortaanerat Kaj Kleist naapertorlugu siunnersuutigineqartut februaarimi tamanut saqqummiunneqassapput. Matumani apeqqutaalerpoq siunnersuutitut naqinneqartut malitseqarumaarnersut.

Tassami siunnersuummut tapersersuineq milliartuinnarunarpoq – aamma Folketingimi. Ilaatigut aningaasat nunatta avataani atorneqarsinnaasussaannginnerat patsisigalugu. Ilaatigullu aningaasat tusaamanerlugaaqisut taakkua kalaallit qinikkat akornanni tapersersorneqarpallaarunanngimmata. Siunnersuut Inatsisartuni oqaluuserineqarmat Atassut aamma Demokraatit akerliullutik taasipput. Aamma maanna Kuupik Kleistimit IA-meersumit aamma Lars-Emil Johansenimit Siumumeersumit siunnersuut akerlerineqarpoq – naak taakkua Inatsisartuni partinut akuersisunut ilaasortaagaluartut.

Siunnersuummut isumaqataasut ilagaat Venstret nunarput pillugu ataatsimiititaliami ilaasortaatitaat, Joan Erlandsen. Taassuma ajorinngilaa aningaasat nunatsinniinnaq atorneqarsinnaassappata.

- Savalimmiormiut aningaasaat aamma Savalimmiut avataanni atorneqarsinnaanngillat, isumaqarpugullu siunnersuut Savalimmiuni aaqqiinertut isigisariaqartoq, Joan Erlandsen oqarpoq. Aamma taassuma kalaallit politikeriisa akornanni isumaqatigiinnginneq ernumanartoqartinngilaa.

- Tamanna ernummatiginngilara. Tassami inatsisiliavut innuttaasunit tamakkiisumik tapersersorneqarneq ajorput, Joan Erlandsen oqarpoq.