Nunatta naasui "Noahp umiarsuaani"
Toqqorsivik Svalbardimi Norgimit avannarpasinnerusumi, nunami qeriuaannartumi inissinneqarpoq. Taaneqarlunilu naasunut ’Noahp umiarsuaa’.
Naasut assigiinngitsut nunarsuatsinneersut 4,5 miliuunit naatsiiassartaat 100 miliuunit toqqorsivittaami inissaqartinneqarput. Nunarsuatsinni sorsuttoqarneratigut, naasut nappaataatigut pinngortitalluunniit allanngorneratigut nunarsuatsinni naasut assigiinngitsut nungussinnaammata tammatsaalineqarnissaat toqqorsiviup pilersinneqarneratigut qulakkeerniarneqarpoq.
Nunap ataani qaarusuk minnerpaamik 18-inik issittuaannartumiippoq, minnerpaamillu ukiuni 200-ni piuinnartitsisinnaassaaq, nunarsuup qaavani susoqaraluarpalluunnit. Naatsiiassalli ukiuni tuusintilinni asiunatik piusinnaapput.
Naasut 15-it missaaniittut Kalaallit Nunaanneersut naatsiiassaat toqqorsivimmut aamma ilanngunneqarput, tassami ilisimatuut, soorlu sorlaap kuannillu naatsiiassaannik 2006-imi septembarip qaammataani katersaat, toqqortanut ilanngunneqarput.
