Nunatta Katersugaasivia nutaamik suleqatitaarpoq
Tamanna pivoq sisamanngornermi Nunatta Katersugaasiata pisortaata Daniel Thorleifsenip museumsinspektørillu Søren La Courip atsioqatigiinnerisigut.
Katersugaasiviit taakku marluk suleqatigiinnissamik isumaqatigiissutaasa qularnaassavaat suleqatigiissutaasarumaartussat pillugit paasissutisseeqatigiittarnissaq ilisimatusarneq qaammarsaanerlu pillugit. Assersuutigalugu immikkut saqqummersitsisoqassatillugu katersugaasivimmi pigisat atukkiunneqartarsinnaasassapput.
Fredriksborg Amts Avis ullumi taama allaaserisaqarpoq.
Danmarkimi neriuutigineqarpoq isumaqatigiissut aqqutissiuusseqataajumaartoq Hundestedip umiarsualiviani nutaamik Knud Rasmussenimut katersugaasiviliornissamut.
Nutaamik katersugaasiviliornissami Knud Rasmussen ilisaritinniarneqassaaq, Kalaallit Nunaatali Danmarkillu naapinnerat tamaat saqqummiunneqarusuppoq, Knud Rasmussenip nammineq tamanna qanoq misigisimaneraa, aammali siunissami Kalaallit Nunaata issittumiittutut silaannaap allanngoriartorneratigut aqqusaarumaangassai, Frederiksborg Amts Avis allappoq.
- Takorluukkavut qanittuararsuupput, torrallataassangaluarpoq qajartortoqarsinnaappat. Katersugaasiviliorusuppugut sutigut tamatigut imminut akilersinnaasumik. Takorloorparput taamaalluta Hundestedip umiarsualivianiit Daniel Thorleifsen Nuummiittoq isiginnaarutikkut oqaloqatigisinnaallugu, kulturikkut ataatsimoorutamik misigisaqaqatigalugu, kulturimut ataatsimiisitaliami siulittaasoq Helle Lunderød oqarpoq.
Daniel Thorleifsenip suleqatigiilerneq aamma nuannaarutigaa.
- Kalaallit Nunaata oqaluttuarisaaneranik suliaqartut amerlanngilagut, kikkulli tamarmik manna ilisimavaat. Massuma suleqatigiissutigilernissaa qilanaarisimavara, ullutsinnimi issittoq taama ukkatarineqartigimmat. Kalaallit Nunaat tusakulaneqanngilaq, kissaatigaarput kulturikkut oqaluttuarisaaneq pillugu annertuumik suleqateqarnissap aallartinnissaa, Daniel Thorleifsen Frderiksborg Amts Avisimut oqarpoq.
