Nunatta Katersugaasivia: Kalaallisuut ineriartortuartuupput
Atisanik ilusilersuisartup Peter Jensenip kalaallisuut ilusaat aallaavigalugit ilusilersuisimanerata aalassassimaarutaanera Nunatta Katersugaasiviani sulisup, Aviâja Rosing Jakobsenip eqqumiigaa.
Allattoq Elisa Isaksen
marsip 24-at 2009 14:41
Kalaallisuummi ilusaat allangullattaajuarlutik ineriartortinneqarsimapput, kalaallisuuliortartut namminneq aamma isumassarsiortariaqarput ilutsinillu ineriartortitsillutik. Kalaallisuut siulliit tuttup amiinik sananeqartariarlutik piffissap ingerlanerani Europamiut piinik ilaartorneqalersimapput.
- Nunarsuatsinni inuiaat atassuteqarniarnerat ajornanngissiartortillugu immitsinnut sunneqattaattuarnissarput nuannariinnartariaqarparput. Nunatsinni kalaallisuuliortartut aamma killilersorneqartutut misigisariaqanngillat. Ineriartortuarneq unitsinniassagaluarutsigu kinguaariit ileqqutoqaat unitsikkiartuinnassavarput, tamanna kialuunniit kissaatiginavianngilaa, Aviâja Rosing Jakobsen Sermitsiamut oqarpoq.
