Nunatta karsiata siorna amigartoorutai ilaqqipput

Inatsisartut upernaaq manna atatsimiilerunik akuersissutigisassaasa siullersaraat, 2008-mi immikkut ittumik aningaasaliissutit 89,5 millioni koruunit. Inatsisartut aningaasaqarnermut ataatsimiititaliaata arlaleriarluni immikkut ittumik aningaasaliisarsimanera tamatumunnga peqqutaasoq, Per Berthelsen oqarpoq.

Ukioq manna amigartoorutaasussat ilanngukkaanni Nunatta karsia ukiut marluk ingerlanerinnaani 700 millioni koruuninik amigartoortussanngorpoq.

Kisianni Per Berthelsen neriorsuivoq, Nunatta aningaasaqarnera ajornartorsiunngitsoq.

- Naamerluinnaq, Per Berthelsen tunngavilersuivoq.

Nukissiorfiit sanaartugassaanut Inatsisartut aningaasaliissuteqartarnerat, Nunatta Karsia sunniuteqangaatsiarpoq. Sanaartugassanut siorna 342 millioni koruuninik ukioq mannalu 249 millioni koruuninik aningaasaliissutigineqarput, tassa ukiuni taakkunani amigartoorutinit 700 millioniusunit 591 millioni koruunit Nukissiorfinnut attuumassuteqarput.

Naalakkersuisut nukissiuteqarnermik immikkut ilisimasalimmik misissuititsisimapput, taasumalu inerniliuppaa, Nukissiorfiit aktieselskabitut allatulluunniit assigisaatut aaqqissuunneqarnissaat siunnersuutigineqassammat.

Inatsisartullu upernaaru ataatsimiinnissaminni tamanna akuersissutigissagaat, Per Berthelsenip naatsorsuutigaa.

- Taamaalippallu amigartoorutitut isikkoqartut tamarmik oqimaqatigiilissapput, aningaasaqarnermut naalakkersuisoq oqarpoq.

Nunatta karsiata siorna amigartoorutaasa 89,5 millioninik koruuninik ilaqqinneri aappaagu aningaasaliissutissanut sunniuteqarnissaat avaqqunneqarsinnaangitsoq Per Berthelsen oqarpoq.

- Tassami 89 millionit nalingi mangiarneqareermata, taakkua arlaatigut matussutissaanik ujarlertariaqassaanga, aningaasaqarnermut naalakkersuisoq, Per Berthelsen, oqarpoq.