Nunatta karsia imaqanngilaq

Naatsorsuutigeriinngisanut aningaasartuuteqartoqalissagaluarpat aningaasat Sanaartornermut Aningaasaateqarfimmit tiguneqartariaqassapput, sanaartugassatullu pilersaarutigineqartut unitsikkallarneqartariaqassallutik.

- Nunatta karsianit imaaliallaannarluta atugassatsinnik aningaasaateqanngilagut, Palle Christiansen oqarpoq.

Nunarput 920 millionit koruuniuteqaraluarpoq, Sanaartornermulli Aningaasaateqarfimmut taakku pituttugaallutik. Assersuutigalugu erngup nukinganik Ilulissani nukissiuuteqarfiliornissamut 600 millionit koruunit immikkoortinneqarsimallutik.

Naatsorsuutigeriinngisanut aningaasartuuteqartoqassagaluarpat Aningaasaateqarfimmiit tiguneqartariaqassapput, sanaartugassatullu pilersaarutigineqartut unitsinneqarallartariaqassallutik.

Naalakkersuisut aningaasanik nunanit allanit atorniarlutik ajornartorsiut tamanna aaqqiiviginiarpaat:

- Suliffeqarfissuarnut soorlu erngup nukinganik nukissiuuteqarfinnut aningaasat taakku atukkiussinnaavagut, Nunattalu karsianut kingorna utertissinnaassallugit. Aningaasanik atoriaannarnik taamaasilluta peqalersinnaavugut, Palle Christiansen oqarpoq.

Aningaasanik atorniariarluni suliffieqarfinnut atukkiisoqarsinnaavoq, naatsorsuutigeriinngisamilli aningaasartuuteqartoqalissagaluarpat nunarput qanoq iliussanersoq Palle Christiansen aperaarput, akivorlu:

- Naalakkersuisut atorfilittallu 2011-mut aningaasanut inatsisissatut siunnersuut pillugu ippassaq isumasioqatigiipput, missingersuutit sipporlugit atuisoqannginnissaa matumani anguniagaalluni. Allaffissornerup allatut ingerlanneqarsinnaanissaa aamma eqqarsaatersuuteqarfigaarput, sippuisoqannginnissaa pillugu aqutsisoqarsinnaanissaa anguniarneqarsinnaalluni, Aningaasaqarnermut naalakkersuisoq oqarpoq, nangillunilu:

- Peqqinnissaqarfik assersuutigineqarsinnaavoq. Aningaasanik aalajangersimasunik taakku pisarput, namminerlu aqussinnaallugit. Aningaasanilli amerlanerusunik pisinnaanngillat. Missingersuutit qaangernaveersaarlugit akisussaassusilimmik atuisoqarnissaa taamaasilluni anguneqarsinnaavoq, Palle Christiansen oqarpoq.

Akitsuutinik assigiinngitsunik qaffaanissamik allatigullu sipaarniuteqarnissamik Naalakkersuisut 2011-mut aningaasanut inatsisissatut siunnersuummi siunniuppaat.

Namminersorlutik Oqartussani 30 millionit koruunit sipaarniarneqassapput, akitsuutinilu assersuutigalugu benziinamut liiterimut akitsuut 25 oorinik qaffanniarneqarluni.