Nunatta Karsia ilimagisamit sinneqartoorneruvoq
Akileraarutitigullu isertitat amerlanerusimanerat sinneqartoorutit amerlinerannut peqqutaaqataapput:
- Ilaatigut Qaasuitsup Kommuniani uuliasiornerup annertuseriarneranik peqquteqartumik, toqqaannartumik akileraarutitigut isertitagut amerlisimapput. Aamma Kommuneqarfik Sermersuumi akileraarutitigut isertitat amerlisimapput, kommunit sinnerini isertitat allanngorsimanatik. Akileraarutillu amerlisimammata soorunami nuannerpoq, oqarpoq.
Kisianni aamma oqarpoq, imaanngitsoq eqqissilluta naammagisimaarinnissasugut:
- Immikkut ittumik isertitat ataasiaannartamillu isertitat immikkoortillugit isiginissaat pingaarpoq. Taamaalioruttalu takusinnaavarput, Nunatta Karsiata ingerlatsinermut sanaartornermullu naatsorsuutai taamaallaat 32 millioni koruuninik sinneqartooruteqartut. Taakkua ingerlatsinermut sanaartornermullu sinneqartoorutinit tamanit 207 millioninit allaanerupput. Taamaammat oqaatigissallugu pingaarpoq, aap, isertitarpassuaqarpugut, kisianni ilarpassui immikkuullaripput ataasiartaallutilluunnit, Maliina Abelsen oqarpoq.
Aningaasanut inatsisissaq pillugu Inatsisartuni siornaak sukataarluni oqallinnerit eqqaagaanni, tulluusimaarnissamut pissutissaqartoq, nangippoq.
- Eqqaamavara, aningaasanut inatsisissaq suliarigatsigu, sakkortunerpaamik isornartorsiuisut oqarfigisarmatigut, missingersuusiarput iluatsikkunnanngikkipput, aammalu aningaasanut inatsit kusassagaannaasoq. Taamaammat isumaqarpunga tulluusimaarsinnaasugut oqarlutalu iluatsipparput, oqarpoq.
Nunatta Karsialuunniit siorna sinneqartooruteqarsimagaluarpat, Nunarput aningaasarsiornikkut angisoorsuarnik siunissami unammilligassaqartoq, taakkua suli ilumoorunneqartariaqartut, Maliina Abelsen erseqqissaavoq, eqqaasitsissutigalugu Nunarput 30 milliardi koruuninik 2040-p tungaanut aningaasassarsiortariaqarmat.
