Ilisimatooq: Nunatta isumaqatigiissutinik atsiugaqarnera Naalagaaffeqatigiinnut pitsaasuuvoq
- Kalaallit Nunaata isumaqatigiissutinut Danmarkip aamma atsioqataaffigisimasaanut ilanngunnera siuariarneruvoq, aamma naalagaaffeqatigiinni inatsisiliornermut tunngatillugu pisariillisaataassaaq, Cindy Vestergaard taama oqarpoq.
Atomip nukinganut tunngasutigut sillimaniarnikkut isumagisassat aamma ulorianartumik qinngornertalimmik ajutoortoqassagaluarpat ikiuunnissaq pillugu isumaqatigiissutinut Kalaallit Nunaat taamaalilluni pisortatigoortumik akuersivoq, Cindy Vestergaard taama isumaqarpoq.
Tamannali Kuannersuarni uranimik piiaasoqarsinnaalerneranik isumaqanngilaq. Isumaqatigiissutinik atortussanngortitsinikkut atomip nukinganut tunngasutigut nunani tamalaani isumaqatigiissutit atuuttut malinneqartussanngorput.
- Kalaallit Nunaat siumut ingerlavoq, aamma uranisiortoqanngikkaluarpalluunniit. Inatsisiliornerit iliuusissallu nunani allani atorneqartut toraarlugit ingerlavoq, Kalaallit Nunaatalu isumaqatigiissutini pisussaaffiulinneqartunik malinninnissaa isumagineqarpoq. Matumani pisoq uranimik piiaanissap aallartissinnaanngorneranik isumaqanngilaq, siunissamili aatsitassanut tunngatillugu toqqissisimanissaq pineqarluni, Cindy Vestergaard taama oqarpoq.
Aamma atuaruk Nunatta uranisiortunut ilanngunnera Vittusip nuannaarutigaa
Cindy Vestergaard naapertorlugu Nunatta isumaqatigiissutinut ilanngunnera aningaasalersuerusussinnaasunut aatsitassarsioqatigiiffinnullu aamma iluaqutaassaaq, naalagaaffeqatigiinni malittarisassat assigiit atorneqarneri aningaasalersuerusussinnaasut eqqissiallaatigisinnaammatigit.
- Isumaqatigiissutip naalagaaffeqatigiinni qanoq atuutsinneqarnerata siornatigut isumaqatigiinngissutigineqarnera pissutigalugu, qanoq peqatigiilluni ingerlatsisoqarsinnaaneranut aningaasalersuerusussinnaasunut nunanullu allanut paatsiveerunnartupilussuusimavoq, Cindy Vestergaard taama oqarpoq.
Nunatta isumaqatigiissutinik atortussanngortitsinera Cindy Vestergaardip pitsaasutut isigaa, ingammik atomip nukinganut tunngasut pillugit pitsaanngitsumik oqallisigineqaleraangata.
- Atomip nukinganut tunngasutigut isumannaallisaanissamik ileqqoqarnermut qulakkeerinneqataassaaq, tamannalu ilaatigut Fukushimamut Chernobylimullu tunngatillugu oqaluttoqaraangat eqqaassallugu pingaartuuvoq. Kalaallit Nunaat inatsisiliornernut isumaqatigiissutinullu annertuunut katitigaasimasunullu kiisami ilannguppoq. Tamannalu alloriarneruvoq annertuupilussuaq, tamarmi pitsaalluinnarpoq. Aamma pitsaasunik eqqartuisoqarsinnaalernera pitsaaqaaq, Cindy Vestergaard taama oqarpoq.
Aamma atuaruk Vittus: Ernumanissaq aarlerisaaruteqarnissarluunniit kissaatinginngilara
Nunatta isumaqatigiissutit atortussanngortitami marluusut saniatigut allat pingasut atortussanngortittussaavai. Ilaatigut atomip nukinganut tunngasunik piiakkat illersugaanissaat pillugu isumaqatigiissut. Tamatumani pineqarluni atortussiat atomip nukingasut tunngasut tillinneqannginnissaannut anngiortumillu anninneqannginnissaannut qanoq paaqqutarineqassanersut isumannaarneqarsimassanersullu.
