Nunatta issittormiullu ikinngutaat toqukkut qimaguppoq
Siornatigut Socialdemokratit siulittaasorisimasaat Svend Auken ullaaq 66-inik ukioqarluni toqukkut qimaguttoq pillugu, taama allappoq naalakkersuisut siulittaasuat Kuupik Kleist.
- Aliasungaarlunga Svend Aukenip toquneranik nalunaarut tiguara. Svendi politikeriuvoq takorluuisartoq. Inuummarissuuvoq kissalaartoq, ilumoortumik Kalaallit Nunaannut tunngassuteqartunik soqutiginnittoq, naalakkersuisut siulittaasuat allappoq.
Svend Auken Avatangiisinut nukissiornermullu ministeriunermi nalaani Kalaallit Nunaata aatsitassanut nukissiuuteqarnermullu tunngasut oqartussaaqataaffiginiarneranni suleqataalluarsimavoq. Nunanullu tamalaanut tunngatillugu Issittumi Siunnersuisoqatigiit pilersinneqarneranni suliniuteqaqataavoq, issittumi avatangiisip suleqatigiiffeqarnissaa pingaartillugu.
- Eqqaaneqarnera ataqqinartuuli, Naalakkersuisut siulittaasuata Kuupik Kleistip eqqaaniaalluni allakkani taama naggaserpai.
Aamma Inuit Issittormiut Siunnersuisoqatigiiffiata Nunatsinni siulittaasuata Aqqaluk Lyngep, Svend Auken Nunatsinnut ikinngutaalluaannarani Issittormiut ikinngutaattut taavaa.
Svend Aukenip 70-ikkut aallartilaarneranni Moses Olsen Folketingimut ilaasortanngoqatigaa. Svend Aukenip Kalaallit Nunaanni politikkikkut ingerlaaseq taamanikkulli soqutigisarilerpaa, Aqqaluk Lynge allappoq erseqqissarlugulu Auken Issittumi Siunnersuisoqatigiit pilersinneqarneranni nunat inoqqaavisa kattuffiisa naalakkersuisullu akornanni naligiimmik suleqatigiinnissaq illersorsimagaa.
