Nunatta Isiginnaartitsisarfiata sinerissamut angalanissani taamaatiinnarpaa
Taamatullu aalajangiisoqarnera pissutigalugu Nunatta Isiginnaartitsisarfiata Nuarput tamakkerlugu aappaagu angalanissaminik taamaatitsiinnarnernik kinguneqareerpoq.
- Angalalluni isiginnaartitsinerit ikilisittariaqassavagut aningaasartuutitaqartupilussuusarmata. Qaanaamit Nanortalimmut meeqqanut isiginnaartitsissummik angallassiniarluta pilersaatueqaraluarpugut. Taanna taamaatiinnartariaqarparput. Najugaqarneq angalanerlu akisuallaaqaat.
Nunatta Isiginnaartitsisarfiata pisortaa Svenn Syrin taama oqarpoq.
Isiginnaartitsisarfik Nunatsinni angalanngippallaarnerarlugu isornartorsiorneqarsimavoq, missingersuutilli 10 mio. koruuninit 7 mio. koruuninut ikilisinneqarnesigut tamanna ajorseriaannartussanngorpoq. Tamannalu isiginnaartitsisarfiup pisortaata ugguarisupilussuuaa.
- Ajorluinnartutut isigaarput, isornartorsiorneqarnerput iluarsiniarlugu angalaniaraluarpugut. Isiginnaartitsissut Qullissat sinerissami angallassinnaajunnaarparput. 750.000 koruuninimmi akeqassaaq, taamatullu isertitaatigisinnaanngilarput. Isiginnaartitsissut marlunnik pingasunilluunniit inuttalik immaqa angallassinnaassavarput.
Missingersuutilli ikilisinneqarnerisigut aningaasartuutit amerlavallaalertussaassapput.
- Isiginnaartitsisarfimmi isiginnaartitsisarfinnut inatsimmi pisussaaffimminik naammassinnissinnaanngitsumi pisortaalluni nuannersuunngilaq.
Svenn Syrin oqarpoq.
Isiginnaartitsisarfiup pisortaa oqaluttuarpoq aappaagumut missingersuutit nutaat pingasut suliarereersimallugit, siulersuillu sutigut sipaarniartoqassanersoq aalajangertussaassagaat.
- Sipaarniarfigineqarsinnaasoq tassaavoq sulisoqarneq, tamaaliortoqarpallu sulisut sinneruttut marloriaammik sulisariaqalissapput.
Isiginnaartitsisarfiup sulisunik aalajangersimasunik sulisoqarani suliassaminut sulisunik attartortariaqarnissaa aamma oqaatigaa, tamannalu aamma unamminartussaanerarlugu.
- Inuit maani sulilernissartik utaqqiinnarneq-ajorpaat. Allami suliffittaartarput. Taamaammat imaassinnaavoq pissarisiarisinnaanngikkigut tamannalu naggataatigut akisunerulissaaq. Naatsorsuutilli amigartooruteqarfiunnginnissaat siunertaralugu taamaaliortariaqassaagut. Aamma isiginnaartitsisartunngorniarfik ingerlapparput, taannalu ukiumut 1,7 mio. koruuninik aningaasartuuteqarfigisarparput. Taanna qanoq-iliussavarput. Tamanna siulersuisut aalajangiiffigisariaqassavaat.