Nunatta Isiginnaartitsisarfia tipsernermit lottornermillu aningaasanit taperneqartassaaq

Nunatta Isiginnaartitsisarfia tipsernermit lottornermillu aningaasaliissutinit tapiiffigineqarnissaa Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisumit, Nick Nielsenimit neriorsorneqarput. Harald Bianco-p paragraf 37 naapertorlugu apeqqutaanut akissuteqarnermini taama Nick Nielsen neriorsuivoq, oqarlunilu kulturikkut suliniutit allat aningaasaliiffigineqartarnerinut tamanna annikillisaanermik kinguneqassanngitsoq.
Allattoq Apollo Jeremiassen
decembarip 22-at 2013 14:18

Danske Spilimit Nunatsinnut aningaasaliissutit ukiuni kingullerni amerleriarsimagaluartut, tapiiffigitinnissamik qinnuteqartut aningaasaliiffigineqartartullu amerleriarsimanngillat, tamatumalu kinguneraa aningaasat tapiissutigineqarsinnaasut amerlanerulersimanerisa.

- Taamaammat Nunatta Isiginnaartitsisarfia tapiiffigisassatut siullertut inissinnerani qinnuteqartut allat tapiiffigineqarsinnaaneri annikinnerulissanngilaq, Nick Nielsen akissummini allappoq.

Nunatta Isiginnaartitsarfia ukiumut 7,2 million koruuninik tapiiffigineqartartoq, Aningaasanut Inatsisissatut siunnersuummit tapiiffigineqartarnera 3 million koruuninik ukioq manna  ilanngarneqarpoq, tassalu tipsernermit lottornermillu aningaasaliissutinit taakku taarserneqartutut oqaatigineqarsinnaallutik.

Tipsernermit lottornermillu aningaasaliissutinit tapiiffigineqarnissamik qinnuteqartunut aningaasat annerpaamik 150.000 koruunit tunniunneqartarput, Nunattali Isiginnaartitsisarfia 3 million koruuninuik tapiiffigineqartassaaq. Tamassuma saniatigut suliniutinut allanut soorlu isiginnaagassiornernut angalallunilu isiginnaartitsisarnernut aningaasartuutit 75 procentiinik tapiisarneq Nunatta Isiginnaartitsisarfianut atuutissanngilaq tassa 100 procentimik taakku taperneqartalissammata.

Tamannaannaanngilarli. Ataavartumik isiginnaagassiortarneq ingerlatiinnarniarlugu, Nunatta Isiginnaartitsisarfia ataatsimoortumik aamma qinnuteqarsinnaalerpoq. Qinnuteqarnermili uppernarsaatit aamma nassiunneqartassallutik.

Tassa Nunatta Isiginnaartitsisarfiata isiginnaagassiortarneri Nunatsinnilu illoqarfinnut angalasarnissannik pilersaarutit apeqqutaallutik tapiiffigineqartalissapput.

- Tamanna ima paasineqassaaq. Isiginnaagassiornernut Nunatsinnilu illoqarfinnut angalasarnissanut qinnuteqartarnerni aningaasat tapiiffigineqartartut amerliartornissaat ilimagineqarsinnaavoq.

Harald Biancop paragrfa 37 naapertorlugu apeqqutaanut, Naalakkersuisunut ilaasortaq, Nick Nielsen taama akissuteqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq