Nunatta EF-imit anineranit ukiut 25-t qaangiupput
Taamani EF-imiit aninitsinnut, imartatsinnut, aalisagaatitsinnut pisuussutinullu allanut nammineq oqartussaarusunneq peqqutaasoq Jakob Janussen oqarpoq.
- Nunatsinni qinersisartut aalajangerneranni qularnanngitsumik pissutaanerpaavoq, imartatsinni aalisagartassat pillugit EF-mi aalajangiisarneq qimanneqarusummat, Jakob Janussen oqarpoq.
Danmark EF-imut 1973 ilaasortanngormat, Nunarput, suli namminersornerulersimanngitsoq, aamma ilaasortanngorpoq, naak Nunatsinni taasisut 70 procentii naaggaaraluartut.
1982-imilu taasinermi amerlanerussuteqartut ilaasortaajunnaarnissaaq qinerpaat, sivisuuumillu isumaqatigiinniartoqareersoq, Nunarput 1985-imi ilaasortaajunnaarpoq.
Nunarput ilaasortaanermini aningaasaqarnikkut assigiinngitsutigut iluaquteqartarpoq. Aamma EF-ermiut aalisagartassaqartinnerisigut, Nunarput aningaasanik isertitsisarput, maanna suli attaneqartunik.
Jakob Janussenip qularutiginngilaa, Nunarput ilaasortanngorniassappat, EU-mit tikilluaqquneqassasoq.
- Nunatta pisuussutai ullumikkut suli annerusumik iluaqutigineqanngitsut, aatsitassat, uulia gassilu EU-mit annertuumik soqutigineqartut nalunanngilaq, aammalu nunatta imartaa aalisaganeqqissagaluarpat, EU ilaasortaqarpoq, aalisarnermik annertuumik soqutigisaqartunik, Jakob Janussen oqarpoq.
EU-mut isumaqatigiissutit assigiinngitsut Nunatsinnut ukiumut 323 millionit koruunit missaannik isertitsissutaasartut.
Aamma Nunatsinni aalisakkat EU-mut tunisat akitsuuserneqarneq ajorput.
Kisianni Nunarput siunissami ilaasortanngoqqikkaluaruni, tamanna aningaasatigut iluaqutigissaneraa Jakob Janussenip qularutigaa:
- EU-mi nunat ilaannut kinguarsimanerusunut piorsaanermut atugassanik aningaasaateqarfeqaraluarpoq, kisianni nunat arlallit EU-mut ukiuni kingullerni ilanngunnerisigut, EU-p aningaaaateqarfiiniittut pagganneqarnerulernikuupput, Jakob Janussen oqarpoq.