Nunatta Danmarkillu akornanni saammaasseqatigiinnissamut isumalioqatigiissitaq piviusunngortinneqarusuttoq

Naalagaaffiit Kalaallit Nunaanni ataasinngornermi ataatsimiinnerisa kingorna Kalaallit Nunaata Danmarkillu akornanni saammaasseqatigiinnissamut isumalioqatigiissitap pilersinneqarnissaa suliniutigineqarpasilerpoq.

Ministeriunerup Mette Frederiksen ip(Socialdemokraterne) naalakkersuisullu siulittaasuata Jens-Frederik Nielsenip (D) pisut pereersut saammaasseqatigiissutigineqarnissaata qanoq pisariaqartiginera tassani oqalugiaatigaat.

- Isumaqarpunga nunatta danskillu oqaluttuarisaaneranni qaquguluunniit killiffiliinavianngitsugut. Uannut arlaannik isumagisassamut naammassissamulluunniit tunngassuteqanngilaq. 

- Uannut oqaluttuarisaanitta ajunngitsortaqarneranut nuanninngilluinnartoqarneranullu tunngassuteqarpoq. 

- Danmark Kalaallit Nunaallu pisunut pereersunut qiviarnissaminnut sapiissuseqarnerat annertusiartortillugu naligiimmik ataatsimooqatigiinnissatsinnut ullumikkut tunngavissaqarnerulissaagut, Mette Frederiksen oqarpoq. 

Danskit naalakkersuisui oqaluttuarisaanermik qulaajaasitsilereerput. Mette Frederiksen tamanna ilutigalugu spiralilersuinermi suliami meeqqallu misileraatigineqartut pillugit suliami utoqqatsereerpoq.

Meeqqat misileraatigineqartut tassaapput kalaallit meerartai 22-t ilaquttaminniit 1951-imi danskit tarnikkut pissutsit pillugit isumaginninnermi ingerlatseriaasermut politikkikkullu piorsarsimassusermullu tunngatillugu suliniummut, misileraanermik taaneqaannartartumut peqataajartortinneqarlutik Danmarkimut aallarunneqarnikut.

- Siulliit maanna taarsiivigineqarput. Saammaasseqatigiinnissamullu suliaqarnissaq maanna siunniupparput. 

- Tamanna qanorpiaq pissanersoq nalugallarparput. Ullumikkut eqqartorparput nunalilu allani qanoq periuseqartoqarsimanera misissussavarput, Mette Frederiksen oqarpoq.

Oqaluttuarisaanermi taartut qulaajarneqassasut

Naalakkersuisut siulittaasuat, Jens-Frederik Nielsen, saammaasseqatigiinnissamut isumalioqatigiissitaliortoqarnissaanut piumasaqarnera toqqaannarneruvoq. 

- Saamaasseqatigiinnissamut isumalioqatigiissitaassaaq aalajangersimasoq. Nunatsinniinnissaalu kissaatigaarput. Taava nunanit allanit saammaasseqatigiinnissamut isumalioqatigiissitaqarsimasunut, soorlu Canadamit New Zealandimiillu isumassarsiorfissarsiorsinnaavugut.

- Suna tamaat qulaajartariaqarparput eqqartueqatigiillutalu. Suliaqarnerlu piaartumik aallartissavarput, Jens-Frederik Nielsen. 

Taassuma aamma saammaasseqatigiinnissamut suliaqarnerup kinguneqarnissaa erseqqissarpaa. 

- Oqaluttuarisaanitsinni taartut qulaajarneqarnissaat piumasarigipput erseqqissorujussuarmik oqaatigereernikuuarput. Eqimattaliallu ilisimariikkagut tuaviuunneqarnissaat piumasaraarput. 

- Maanna arnat spiralilerneqarnikunut tunngatillugu qulaajaasoqareerpoq. Eqimattanilli allanik ilisimasaqarfigisatsinnik aamma peqarpugut taakkualu aamma iliuuseqarfigineqassapput, Jens-Frederik Nielsen oqarpoq. 

Taassuma nunarput danskinit peqataaffigineqanngitsumik saammaateqatigiinnissamut isumalioqatigiissitaqarnikuunerarpaa. Maannali peqataaffigissagaa oqaatigaa.

- Kalaallit Nunaannit Danmarkimiillu peqataaffigineqartumik saammaateqatigiinnissamut isumalioqatigiissitaqalissaagut. Iliuuseqarfigisatsinnillu. Qanorpiaq ataqatigiississanerlutigu uterfigeqqikkumaarparput, Jens-Frederik Nielsen oqarpoq.

RITZAU