Nunatta Danmarki tapersersussaneraa suli aalajangerneqanngilaq

- Oqaloqatigiinnerit nangeqqinnissaat isumaqatigiissutigaarput. Københavnimi decembarimi ataatsimeersuarnissap tungaanut piareersarnigut suli nangeqqissallugit ullumi isumaqatigiissutigaarput, Kuupik Kleist oqarpoq.

Nunarput tusarniarneqartutut misinnarnersoq, Kuupik Kleistimut apeqqutigaarput, akivorlu:

- Immaqa imatut oqarsinnaavugut: Misinnarpoq isummagut annertunerusumik qanilliartorneqartut. Imaaginnanngitsoq isummat Nunatsinneersut kisimik qanilliartorneqartut, kisianni soorlu siusinnerusukkut oqaatigisattuut nunat ineriartorfiusut aammalu nunanut pisuuninngaanniit allatut inissisimasut soqutigisaasa qanilliartorneqarnerat isumaqarpunga malunnarsisimasoq, naalakkersuisut siulittaasuat oqarpoq.

Kuupik Kleistip Connie Hedegaardillu ataatsimiinneranni alloriaqqittoqaraluartoq, suut isumaqatigiissutigineqarsimanersut Kuupik Kleistip oqaatigisinnaanngikkallarnerarpai, suliassanik suli naammassisassaqarmat, avatangiisinilli illersuinissamik soqutigisaqarlutik nunarsuarmioqatigiit maanna oqaluuserisaqalersimasutut Kuupik Kleistip nalilerpai.

- Avatangiisit pillugit nunat tamalaat akornanni isumaqatigiissummi ilaasinnaanerput siunertariuarparput, piumasaqaativulli sakkortuutut oqaatigineqarsinnaagaluarput, kisianni aamma pingaartittorujussuuarput nunarsuarmioqatigiit avatangiisinik illersuinissamik soqutigisaqarlutik isumaqatigiissuteqarnissaat. Taammaattumik soqutigisavut qanilliartuutigalugit aamma gassinik aniatitsinerup annikillisarneqarnissaa isumaqarpunga piviusorsiornerusumik oqaluuserineqalersimasoq, Naalakkersuisut siulittaasuat Kuupik Kleist oqarpoq.

Danmarkip silap pissusaanut ministeria Connie Hedegaard qaqugu ataatsimeeqatigeqqissanerlugu Kuupik Kleistip oqaatigisinnaanngikkallarnerarpaa.