Nunatta avannaata kitaani nuna ippassaq ualikkut sakkortuumik sajuppoq
Danmarkimi Kalaallit Nunaannilu ujarassiuutut misissuiffiup nalunaarutit tigusai malillugit nunap sajunnera, sajunnerapaaffianit 90 kilometerisut ungasitsigisumi Pituffimmi (Thule Air Base-imi) malugineqarsinnaasimavoq.
Nunap sajunnera taama sakkortutigimmat, Qaanaami, sajunnerpaaffimmit 195 kilometerinik ungasitsigisumiittumi aamma malugineqarsimasoq misissuiffiup qularutiginngilaa.
Uagullumi maani Radioavisimi tamanna ullaaq oqaluttuaraarput, tassami Qaanaami sikaavinni ilisat allaat avilualaarsimasut malugineqarsimasoq oqaluttuarigatsigu.
Nunarsuarmi tamarmi nunap sajuttarneranik uuttuutit tamarmik, Kalaallit Nunaata avannaarsuata Kitaani nunap sajunnera malugisimavaat.
Kingullermik Kalaallit Nunaanni nunani allani uuttuutinit malugineqarsinnaasumik nuna sajuppoq 2005-imi aggustip ulluisa 30-anni. Nunap sajunnera taamanikkut Richterip uuttuutaa malillugu 5,3-mik sakkortussuseqartoq malugineqarsimavoq.