Nunatta avaleraasartoorniarnera EU-mit isornartorsiorneqarpoq
Kalaallit Nunaata avaleraasartuunik 100.000 tonsinik pisassissuuteqarnera misileraalluni aalisarnermik taaneqarsinnaajunnaarpoq, kommissæri taama isumaqarpoq.
- Kalaallit Nunaat, isumaqatigiissuteqartoqarnissaa sioqqutilaarlugu nammineerluni 100.000 tonsinik pisassiissuteqarnissamik nalunaaruteqarpoq, tamannalu misileraalluni aalisarnermit annertuneruvoq. Tamanna Kalaallit Nunaallu eqqartortariaqarparput, nittartakkamut Fagpressen.eu-mut taama oqarpoq.
Avaleraasartuunik misileraalluni aalisarnermi pisassiissutigineqartut 60.000 tonsinit 100.000 tonsinut qaffanneqarnissaat, pisassiissutissat pillugit isumaqatigiinnernerit kingulliit Reykjavikimi ingerlanneqarnissaat sioqqullugu, Naalakkersuisut februaarip naalernerani akuersissutigaat. Isumaqatigiinniarnerilli taakku ajalusoorutigineqarput, ilaatigut EU-p Islandillu imminnut pisassiissutigineqartut saniatigut Kalaallit Nunaata pisassiissutaanik aalisarsinnaatitaassanersut isumaqatigiinngissutigineqarmat. Kingornalu Norgep, EU-p Savalimmiullu Rusland Islandilu avaqqullugit agguataarinissamik isumaqatigiissuteqarput.
Agguataarinermilu pisassiissutigineqartut 15,6 procentii immikkoortinneqarput, ilaatigut islandimiut Kalaallit Nunaata imartaani aalisarsinnaanngorlugit, matumani NAEFC-mut pisassiissutinik taaneqartartunik 42.537 tonsiusunik. KNAPK-llu siulittuutigaa pisassiissutigineqartut taakku aalisarnissaat pilerngunneqarumaartoq.
- Kalaallit Nunaata qanoq iliuuseqarfiginissaanut siunnersuutinik pitsaasunik saqqummiussisoqarnissaa ammaffigaara, Maria Damanaki Fagpressenimut taama oqarpoq.
