Nunatta aningaasaqarnerata missingersuusiornissaa pingaaruteqarpoq

Aningaasaqarnermut ataatsimiititaliap suliassaanut pingaarnernut ilaavoq nunatta aningaasaqarnerata missingersuusiornissaa – tassa aningaasaqarnermut inatsit – inuit ataasiakkaat paasisinnaassaannik suliarinissaa. Taama oqarpoq Aningaasaqarnermut Ataatsimiititaliap siulittaasua, Ellen Christoffersen, isumaliutissiissut ataatsimiititaliap saqqumiutereeraalu:

Aningaasaqarnermut ataatsimiititaliami ilaasortat ukiup tullissaanut aningaasanut inatsisissaq suliarisarpaat. Naalakkersuisut siunnersuuteqartarput, siullermeerneranilu inatsisartuni ilaasortat ataatsimiittarfimminni siunnersuutit ukiakkut ataatsimiinnerminni oqallisigisarpaat. Oqallinnerlu aallavigalugu ataatsimiititaliamut oqallisigineqarsimasut utertinneqartarput. Aappassaaneerneqartinnagulu ataatsimiititaliami ilaasortat apeqqutit, siunnersuutit oqaaseqaatillu aallavigalugit isumaliuutissiissummik saqqummiussassaminnik allagaqartarput. Ilaatigullu naalakkersuisuni ilaasortat isummerfigisassaannik allagaqartarlutik. Minnerunngitsumik aningaasaqarnermut ataatsimiititaliami ilaasortaasugut pisussaaffitta annersarivaat innuttaasunik tamanit aningaasaqarnermut inatsisiliarput paasineqarsinnaasunngorlugu saqqummiunneqartarnissaa. Ataasiaratalu naalakkersuisut erseqqinnerusumik allagaqaqqullugit noqqaavigisariaqartarsimavagut, Aningaasaqarnermut ataatsimiititaliami siulittaasoq Ellen Christensen taama oqarpoq.