Nunatta Ammerivia tuniniaanerluttuunngilaq

Puisit amiinik tuniniaanerup ajornarsiartornera nunarsuarmi aningaasatigut ajalusoornermik, kiisalu puisit amiisa akikillisimanerinik ilaatigut pissuteqarpoq. Aamma imanngilaq Great Greenland amernik tunisaqanngivissimasoq.

Great Greenlandilu tuniniaanerluttuunngilaq. Taama Great Greenlandip Siulersuisuini Siulittaasoq Anders Brøns radioavisimut oqarpoq:

- Ukiuni kingullerni pisimasut peqqutaagamik. Siullermik aningaasarsiornikkut ajornartorsiorneq, aappassaanillu puisit amiisa akiat minkit amiinit qaffasinnerunerat, minkillu amiisa appariartornerat. Taamaalilluni minkit amii atorumaneqarnerulerlutik, Anders Brøns oqarpoq.

Anders Brønsittaaq oqaatigaa Russit maanna aningaasaat dollarimut naleqqiullugit nalikillisimasut, taamaasillutik pisinissaminnut akissaaleqillutik. Amernillu atisaliortunit minkit amii atorumaneqarnerulersimasut.

- Akit tungaasigut appaasariaqalerpugut. Nunatsinni aamma appaareernikuuvugut. Aamma appaaqqinnissarput ilimanartorujussuuvoq, Anders Brøns oqarpoq.

Aamma taassuma oqaatigaa ammit piniartunut qanoq akilerneqassanersut KNAPK-mut isumaqatigiinniutigineqartartoq. Anders Brønsip erseqqissaatigaa Great Greenlandimi tuniniaanerluttoqanngimmat aamma nunarsuarmi amernik tuniniaaviit annersaat aqqutigalugu tuniniaasarlutik, tassaliuna nunarsuarmi aningaasarsiornikkut niuernikkut pissutsit aalajangertaraat amernik niuernikkut pissutsit qanoq innerat.

Anders Brønsip aamma oqaatigaa aningaasatigut inissisimanertik malinnaavigiuarlugu aasallu ingerlanerani qanoq iliortoqartariaqarnera ersarinnerulerumaartoq.