Nunatta Ammerivia immikkut ittumik aningaasaliiffigineqarpoq

Aningaasaqarnermut naalakkersuisup Palle Christiansenip tamanna uppernarsarpaa. Aningaasaliinerli piumasaqaatitaqarpoq.

Aningaasanik tigoriaannarnik takussutissanik qaammatit tamaasa nalunaarusiortassaaq, tamannalu tunuliaqutaralugu 8 millionit koruuninik aningaasalersorneqarnissaa naalakkersuisut innersuussutigaat, aningaasaqarnermut naalakkersuisoq oqarpoq:

- Suliassat ukiuni kingullerni uninngatiinnarneqarsimasut aaqqiivigineqarnissaannut naalakkersuisuni pisussaatinneqarpugut, Nunatta Ammeriavianullu tunngatillugu qangalili aaqqiisoqarsimasariaqaraluarpoq, Palle Christiansen oqarpoq, nangillunilu:

- Suliffeqarfinni assigiinngitsuni ajornartorsiutit aaqqiivigineqartariaqartut maanna suliarileruttorpagut, Nunatta Ammerivianullu tunngatillugu takoqqaassavarput ukioq ataaseq qaangiuppat pissutsit qanoq innersut, qanorlu pisoqarumaarnersoq taamanikkussamut aalajangiiumaarpugut, Palle Christiansen oqarpoq.

Nunatta Ammerivia maanna aningaasaliiffigineqanngippat aningaasartuutissanut akissaqarnavianngillat, akiliisinnaajunnaartutullu nalunaarutigineqartariaqassalluni, taamaammat aningaasaliisoqartoq naalakkersuisunut ilaasortap oqaatigaa.

Puisit amiinik EU-mut eqqusseqqusiunnaarnermi naggueqatigiit Inuit immikkut ittumik pineqarput, tamannalu tunuliaqutaralugu naalakkersuisut isumalluarput, Nunattalu Ammeriviata puisit amiinik tunisaqarnerulernissaa neriuutigineqarluni.

Puisilli amiinik tunisaqarneq massakkutut iinnassappat qanoq iliuuseqarnissaq aalajangiiffigineqarumaartoq, Palle Christiansenip oqaatigaa.

Siunissaq ungasinnerusoq isigalugu Nunatta Ammeriviata anguniagai naliliivigineqassasut taassuma aamma oqaatigaa.