Nunatta amigartooruteqarnissaa sulisitsisut eqqarsarnartippaat

Aningaasanut iniatsissatut siunnersuut nutaaliortuunngilaq, ajornartorsiuterpassuilli sammineqarnatik. Taamaammat siunnersuut takorluugaqanngitsoq siunissamummu eqqanaarinngitsoq, GA-p pisortaa, Henrik Leth isumaqarpoq.

Nunatta karsia aappagu 441 mio. koruninik amigartuussasoq siunnersuutigineqarpoq, taakkunannga 374 mio. koruunit Alcoa-mut tunngasunut atorneqasallutik. Landskarsip ukiualunni amigartooruteqarluni ingerlasinnaanera Henrik Leth-ip ajornartorsiutitut isiginngikkaluarpaa.

- Inuit suliffissaqanngitsuni najugalippasuupput. Ilinniartitsisunik 100-likkaanik amigaateqarpugut. Ajornartorsiutit taamaattut siunissami iluarsineqartariaqarput, taakkununngalu atorneqarpata ajorissanngilarparput. Kisianni siunnersuutigineqartoq malikkaanni anigaasarsiornerput artorsatinneqalissaaq, akissarsiat qaffakkiartorlutik, ataatsimoortumik tapisiat isertitallu allat naleerukkiartornerannik kinguneqartumik, Kalaallit Nunaanni Sulisitsut Peqatigiiffiata pisortaa, Henrik Leth oqarpoq.

Nunaqavissut Sulisitsisut Kattuffiata, NUSUKA-p, siulittaasuata, Gerth B. Lynge-p aningaasanut inatsisissamik amigartooruteqartumik siunnersuuteqarneq aamma ippinnartoqatinngilaa, ilinniartitaanermut aningaasaliiniarnerit iliniarfissanillu annertusaaniarnerit siunissamut aningaasaliissutitut isigigamigit.

- Kisianni Alcoamut atatillugu Nunatta karsia aningaasaliisariaqanngilaq. Alcoa-p misissuinerit namminneq nammassinnaavai. Kingusinnerusukkut Nunarput qanoq piginneqataassanersoq aalajangertoqarpat nunatta avataaninngaanniit atorniarnikkut aningaasalersorneqarsinnaapput, NUSUKA-p siulittaasua, Gerth B. Lynge, oqarpoq.