Nunatsinnut tapiissutit 400 millioninik ilanngarumagaluarpaat
Dansk Folkeparti kisimi oqaasissaqartuuppat, Danmarkip Nunatsinnut aningaasaliissutigisartagai ikilineqassagaluarput.
Allattoq Elisa Isaksen
Kisianni taama pisoqarnavianngilaq, tassami ukiumoortumik tapiissutit 3 milliardit koruunit sinneqartut Namminersorneq pillugu isumaqatigiissummi aalajangersagaareermata.
Kisianni tassa Dansk Folkeparti pissaanermik tigumiaqaraluarpat, Danmarkip Nunatsinnut ataatsimoortumik tapiissutigisartagai 400 millionit koruuninik ikilineqassagaluarput. Partiip aningaasanut inatsisissamut siunnersuutaani tamanna takuneqarsinnaavoq, tassa Nunatsinnut tapiissutit ikilinerisigut isumaginninnermut peqqinnissamullu aningaasartuutit amerliartuinnartut ilaatigut matussuserneqassagaluarmata.