Kulturi

Nunatsinnut juullimi inuulluaqqusineq 85-issaannik aallakaatinneqassaaq

Sooruna Juullip inuata Kalaallit Nunaat najugaqarfigissallugu toqqarsimagaa? Maria Motzfeldtip Timm Vladimirillu Nunatsinnut ukioq manna juullimi inuulluaqqusinermi tamanna akissutissarsiniarsarissavaat.

Allattoq Simon Uldum -

decembarip 18-at 2016 09:22

Nunatsinnut ukioq manna Juullimi inuulluaqqusineq Danmarkimi Nunatsinnilu isiginnaartartunut Aalborgimi Musikkens Husimit aallakaatinneqassaaq. Inuulluaqqusineq decembarip pingajuani immiussaavoq.

Ukioq manna aliikkusersuisusassat tassaapput Julie Berthelsen, Small Time Giants aamma Erinarsoqatigiit Ikinngutigiit.

Aamma atuaruk Juullimi inuulluaqqussut Aalborgimi ukioq manna immiunneqassaaq

Aliikkutassiani suli ingerlasuni silarsuarmi pisoqaanersaat

Upernaviup pigisaani Kangersuatsimi inuussutissarsiornikkut aqutsisup Andreas Lund-Drosvadip Danmarkip Radioanut 1932-mi allagaqarneratigut Nunatsinnut Juullimi Inuulluaqqusisarneq pileqqaarpoq, ima allammat "Angajoqqaat ilaquttallu Danmarkimiittut Kalaallit Nunaanni qanigisaminnut akeqanngitsumik juullimut inuulluaqqusinerannik Radioqarfik juullip nalaani unnummi ataatsimi marlunniluunniit aallakaatitsisinnaanerluni."

Tamannalu iluatsinneqarpoq, 1932-miillu Nunatsinnut juullimi ukiumoortumik inuulluaqqusisarneq aallartippoq, siullermik radiokkut, kingornalu 1985-imit tv-kkoortalerluni.

Danmarkip Radioata Nunatsinnut Juullimi Inuulluaqqussutaa DR1-ikkut sapaammi decembarip 18-iani nalunaaqutaq 16.00 aallakaatinneqassaaq.