Nunatsinnut angalanini pillugu nassuiaateqartussanngorpoq
Taamaattumik Mogens Sørensen angalanini pillugu Kalaallit Illuata siulersuisuinut ullumikkut nassuiaateqassasoq, aviisimi Nordjyske Stiftstidendemi allaaserinittoqarpoq. Aviisimi aamma allaaserineqarpoq eqqartuussissuserisoq Nicolas Symes naliliisimasoq, peqquserluttoqarsimasoq politiillu misissuinissaannut tunngavissaqartoq.
Angalaneq oqaluuserineqaqisoq maajip aallartinnerani pivoq, tassani angalaqataallutik Mogens Sørensen aamma Aalborgimi Kalaallit Illuanni pisortartaaq Jan Thrysøe nuliatik ilagalugit Nuummut, Ilulissanut Tasiilamullu ulluni 14-ini angalasimasut.
Aalborgimi Kalaallit Illuanni pisortanngortussap Nunatsinni suleqatinut ilisaritinnissaa angalanermi siunertarineqarsimavoq.
Aalborgimi Kalaallit Illuanni pisortap Jan Thrysøep aviisimut Nordjyskemut ilisimatitsissutigaa angalanermi inuk ataaseq 17.000 koruuninik aningaasartuutigineqartoq, nuliatillu angalanerminnut nammineerlutik akiliisimasut. Tamatuma saniatigut nerisaqarnermut unnuinernullu aningaasartuuteqarluni.
Aalborgimi Kalaallit Illuat Namminersornerullutik Oqartussanit aamma Aalborg Kommunemit aningaasaliiffigineqartarpoq, tamarmik immikkut ukiumut 1,8 millionit koruuninik aningaasaliisarlutik.
