Nunatsinnut angalaarneq kuultimut kissassernerusoq
Merry lou Patrick Berdinolu 19-nik ukiullit Cirkusimi isiginnaartitsisartut, immikkut rulleskøjtit atorlugit takutitsissusiaqarput. Taannarpiarlu aappaagu nunarsuaq tamakkerlugu cirkusimi aliikkusersuisartut silarsuaanni katerittoqalerpat, januarip naalernerani Monte Carlomi ingerlanneqartussami, klovni kuultiusoq unammissutigissavaat. Klovnimullu kuultiusumut innersuunneqarneq misigisaq imaannaanngitsuusoq, Merry Loup oqaatigaa.
- Klovni Kuultiusup assigiinnarpaa filmiliaritittartut Oscariat, taannalu nunarsuarmi Cirkusit katerinneranni pingaarnersatut inissisimasuusarpoq. Kialuunniit ullut ilaanni tassunga peqataanissaq sinnattorisarpaa, Marry Lou knr.gl-imut oqarpoq.
Cirkus Arenalli nunarsuaq tamakkerlugu klovnit katerinnissaannut Monte Carlomi ingerlanneqartussami takutitassaat rulleskøjternerinnaanngilaq, tassami Marry Lou takutitsinissami immikkut ”inuk pulateriaarsummik” taasamik takutitsisarpoq. Taakkulu marluk kuultinnanniunnermut Cirkus Arenap Monte Carlomi takutissavaat. Oqaatigineqarsinnaavorlu Arenap nunatsinni angalaarnera tassaasoq, nunarsuarmi Cirkusit katerinnissaannut ingerlanneqartussami kissassernerusoq.
Cirkus Arena-meersut unnugu Aasiaat isiginnaartitsivigereerunikku, Ilulissat tullinnguutissavaat. Taamaasereerpat angalaarnerat nangilluni Danmarkimi festivali Slagelsemi ingerlanneqartussaq peqataaffigissavaat.
