Nunatsinnik asanninneq qalipaganngorlugu

Saqqummersitsineq "En passion for Grønland"-imik taaguuserneqarsimavoq, eqqumiitsuliortullu pingasut tassaasut Per Kirkeby, Aage Berthelsen aamma Johannes Achton Friis Kalaallit Nunaata kangimut avannarpasinnerusortaani pinngortitamik nuannarisaqarnertik qalipakkaminni takutinniarsarisarpaat.

Aage Berthelsen aamma Johannes Achton Friis Danmarksekspeditionimi 1906-imiit 1908-p tungaanut peqataapput, Per Kirkebylu ujarassiuutut sulisuuvoq eqqumiitsuliortuullunilu.
Taanna 2009-mi Tunup avannaarsuaniippoq.

Danmarkimi nunasisut inuiaqatigiinnut akuunerulernissaannut suliniut saqqummersitsinermi aamma ilaatinneqarpoq.

Nunasisut meeraat inuusuttut Gribskov Gymnasiumeersut peqatigalugit aggustimi workshopertinneqassapput, kulturit assigiinngitsut naapeqatigiittarnerat qitiutinneqassalluni.

Saqqummersitsineq aqagu ammarneqassaaq, kalaaleq ujarassiooq Minik Rosing oqalugiassalluni. Taanna Per Kirkeby peqatigalugu Kalaallit Nunaanni angalaarnikuuvoq.

Saqqummersitsineq Odder Museumimi novembarimi nangeqqinneqassaaq. Saqqummersitsineq "En passion for Grønland" katersugaasiviit tallimat suleqatigiinnerisigut piviusunngorpoq, tassaasut: Odder Museum, Gilleleje Museum, Tegners Museum og Statuepark aamma Kunsthus uden Mure.