Siunnersuut: Danmarkimi efterskolertut nunatsinneersut atuaqatigiittalerlik
Danmarkimi efterskolit nunatsinniit efterskoleriartunik arlaqanngitsunik atuartuuteqaannaratik taakkuninnga atuartuuteqarnermut immikkut piginnaanngorsartariaqarput - nunatsinniillu Danmarkimut efterskoleriartut ukiut tamaasa 250-t 300-llu akornanni amerlassuseqartartut efterskolini immikkut piginnaanngorsarsimasuni atuaqatigiiaartariaqarlutik.
Jyllandip avannaani Galtrup Efterskolemi, nunatsinniit Danmarkimut efterskoleriartunik atuartuuteqarnersami pisortaq taama siunnersuuteqarpoq.
AAMMA ATUARUK Kalaallit efterskolertut 17 procentii unitsitsiinnartartut
- Danmarkimi efterskolinik 20-nik taamaaliorusuttunik taamaaliornissaminnillu soqutiginnittunik ujartuissaagut, Galtrup Efterskolemi pisortaq Jens Hvid oqarpoq.
Efterskolit danskit nunatsinneersullu inuusuttut soqutigisaannik, soorlu timersornermik nipilersornermilluunniit neqerooruteqartuaannassapput, Jens Hvid oqarpoq imali nangilluni:
- Atuartulli kulturikkut tunuliaqutaannik paasisimasaqarnissaq taakkualu tunngavigalugit sulerusussuseqarnissaq pingaarneruteqaqaat.
Petra Kunuunnguarlu: Ataatsimoortarnitta nukittunerulersippaatigut
Galtrup Efterskole nunatsinneersunik 50-inik ukioq manna atuartoqarpoq, taakkualu arlaannaalluunniit manna tikillugu taamaatitsiinnarnani.
Galtrup Efterskolemi pisortap oqarnera naapertorlugu nunatsinneersut ataatsimoortarnertik arlaliunertillu toqqissisimanartittarmassuk nutaanik ilikkagaqarnissartik - danskisullu piginnaanngorsarnissartik - nukissaqarfigalugulu sapiissuseqarfigisarpaat.
Nunatsinniillu efterskoleriarsimasoq Uummannamiu 17-inik ukiulik, Petra Kruse Fleischer, Galtrup Efterskolemi atuarnini inuttut ineriartuutigalugu oqarpoq.
- Maanga efterskolerianngikkallarama tunuarsimaartuuvunga, iluamik aperisinnaanangalu akuusinnaananga. Taava maangarama siuariarujussuarpunga, tunuarsimaassaarlunga, ittuussaarlunga akuunerujussuanngorlungalu.
Tasiilameersullu 17-inik ukiullip, Kunuunnguaq Pilluarnartup, efterskolemi tassani atuartuunini nuannaraa.
- Ajunngilaq, nuannerpoq kalaaleqatit amerlasuut ilagalugit taavalu tunumioqatikka efterskoleqatigalugit ajunngittorujuuvoq, inuttaa oqarpoq.
Pisortap oqarnera naapertorlugu nunatsinniit Danmarkimut efterskoleriartut kalaaleqatitillu kalaallisut oqaloqatigiittaramik danskisut piginnaanngorsarnissaminnut sapiissuseqanerulersarput. Kunuunnguaq Pilluarnartorli tamatumunnga isumaqataavallaanngilaq.
- Ilaatigut taamatut eqqarsartarpunga, kinguarsaataasut, inuttaa oqarpoq.
Misigaarli atuartitsissutit allat piginnaaneqarfiginerulersimallugit.
- Qallunaatut, tuluttut aamma ilikkakkakka ikapput, taamaallaat matematikkimi amigaatigivakka.
Pisortap Danmarkimi Efterskolit Kattuffiat isumaqatiginngikkaa
Nunatsinniit Danmarkimut ukiuni kingullerni pingasuni efterskoleriartut 15-t 17-illu procentiisa missaat taamaatitsiinnarsimapput.
Nunatsinniit Danmarkimut efterskoleriartut tarnikkut ajornartorsiutit toqqissisimannginnerlu taamaatitsiinnarnerannut pissutaanerpaasut, Kalaallit Meerartaata nalunaarusiaata takutippaa. Aamma kalaalertatuaasartut taamaatitsiinnarnissaminnut qaninnerpaasarput.
Tamatuma kingunerisaanik Danmarkimi Efterskolit Kattuaffianni siulittaasoq, Torben Vind Rasmussen, isumaqarpoq, kalaallit atuartut ataasiakkaat inuuniarnikkut tarnikkullu ajornartorsiuteqareersut Danmarkimut efterskoleriartortariaqanngikkaluartut.
Taamaatitsinnaraangatami ajornartorsiuteqarnerulikkajupput.
AAMMA ATUARUK Siulittaasup unitsitsiinnartut pissutaat tupaallaatigigai
Jens Hvidili Galtrup Efterskolemeersoq isumaqataanngilluinnarpoq. Taannami isumaqarpoq, Danmarkimi efterskolit kalaallit atuartut suminngaannersuunerat - sunillu nassataqarnerat - eqqumaffiginnerusariaqaraat.
- Kalaallinik atuartuuterpassuaqaraanni taakkua kulturiannik oqaatsitigullu aporfeqarsinnaasarnerannik ukkassinermut paasinninnermullu immikkut piginnaanngorsarsimasariaqarpoq. Kalaalermi atuartoq Danmarkimi 10. klassertuni ukiup ataatsip ingerlanerinnaani peqataalersinnaasanngilaq, Jens Hvid oqarpoq.
Galtrup Efterskolemi pisortaq Danmarkimilu Efterskolit Kattuffianni siulittaasoq kalaallit Danmarkimi efterskolertut taamaatitsiinnartartut qanoq ilioraanni ikinnerulersinnaanersut Namminersorlutik Oqartussanut ataatsimiissutigiartorlugu maajimi nunatsinnukassapput.
