Nunatsinniit avammut nuuttut arnaanerusarput

Roskilde universitetscenterimi lektori Rasmus Ole Rasmussen, kujataani inuuniarnermi atugassarititaasunik sukumiisumik misissuisoq taamatut oqarpoq.

Kikkut Kalaallit Nunaanniit nuuttarnersut erseqqarippoq, tassa nuuttut arnaagajunnerusarput - ilaat nunaqarfinniit illoqarfinnut nooqqaariarlutik Danmarkimut ingerlaqqittarput, Rasmus Ole Rasmussen oqarpoq.

Ilinniakkaminnik naammassinnittartut amerlanerit arnaasarput, taakkualu akornanni qaffasinnerusumik ilinniagaqarsimasut illoqarfinnut annernut, Danmarkimulluunniit nuuttarput. Rasmus Ole Rasmussenip apersuisarluni kujataani misissuisarnermini paasivaa arnat ilinniagaqqortuut nunaqarfinni illoqarfinniluunniit minnerusuni ilinniakkaminnik atuisinaannginnertik pissutigalugu nuuttartut. Misissuinerit kujataaniinnaq ingerlanneqaraluartut ilimagaa pissutsit Nunarput tamakkerlugu assigiissasut.

Ilinniagaqarsimasut ataatsimut qiviaraanni tallimat ilinniagaqarsimagaangata pingasut arnaasarput, tassalu iliniagaqarsimasunit taallimanit marluinnaat angutaasarlutik. Taamaammat soorunami nunaqarfimmiut imaluunniit illoqarfinniit minnerusuneersut najukkaminniiginnarusukkaluarlutik iliniakkaminnik atuisinnaanngikkaangamik aallaannartariaqartarput. Taamaammat ilinniagartuut najukkaminnilu pissutsinik nalunnginnilluartut qimaasutullusooq piinnartariaqartarnerat ajornartorsiutitut angisuutut isigineqartariaqarpoq, Rasmus Ole Rasmussen oqarpoq.