Nunatsinni uuliasiornermi Cairnip aningaasarpassuit atorniarpai
Kalaallit Nunaata sineriaani uuliasiornermi Cairn Energyp aningaasarpassuit atorniarunarpai. Ingerlatsivissuup Cairn Energyp ataani ingerlatsivimmit, Cairn Indiamit aktiat 50 milliard koruunit tuniniarneqarnissaat pilersaarutaavoq. Aningaasat Kalaallit Nunaanni uuliasiornemut atugassat:
- Aningaasanik nuussinerup pilersissavaa, Kalaallit Nunaanni ukiorpanni misissuinernut aamma qillerinernut aningaasanik nikerartitsisinnaanngornissarput, Cairn Energyp pisortaanera, Bill Gammell aviisimut Berlingske Tidende-mut oqarpoq.
Qeqertarsuup kitaata avataani qillerinissanut marlunnut allanut Cairn Energy ullumi akuerineqarluni qillereqqissinnaalerpoq.
Qeqertarsuup kitaata avataani qillerinissanut marlunnut allanut Cairn Energy ullumi akuerineqarluni qillereqqissinnaalerpoq. Qillerinerit siulliit marluk maanna naammassineqarsimalerput, oqaatigineqarpoq "qillerinerit inerneri maannamut suli isertuussaasut, kingusinnerusukkullu paasissutissanik saqqummiisoqarumaartoq aamma", Namminersorlutik Oqartussat tusagssiutinut nassiussaminni taama allapput.
Misiliilluni qillerinerit pilersaarutit malillugit ingerlasut, ingerlatsivissuup Cairn Energyp aamma Naalakkersuisut naqissuserpaat:
- Misiliilluni qillerinissat pilersaarusiorneri ukiorpassuarni sillimaffigisimavarput. Qillerereernernut marlunnut malitsigitinneqartut pissutissamisoortutut isigaagut. Piumasaqaatit siullermik qillerinermi atuuttut aamma maanna atuupput, Kuupik Kleist oqarpoq.
Skotlandimiut ingerlatsivissuat taamatungajak amma nalunaarpoq:
- 2010-mi misissuinissanut amma misiliilluni qillerinernut pilersaarutaareersunut sisamaasunut maanna marlunnik qillerereernemi qillerinissat marlunnik malitseqarnissaannik akuersissummik tunineqarpugut.
KNR-imut Cairn Energy qarasaasiakkut taama allappoq.
Aviisip Berlingske Tidende-p allaaserisaa naapertorlugu ingerlatsivissuit DONG, Exxon Mobil aamma Chevron Kalaallit Nunaanni qillerinissartik maanna utaqqisippaat, Mexicop kangerliumanersuani pissutsit aaqqinneqarnissaata tungaanut.
Taama pilersaaruteqartoqarnera Aatsitassanut Naalakkersuisup, Ove Karl Berthelsenip ilisimasaqarfiginagu oqarpoq, naak aasariartulersoq DONG ataatsimeeqatigisimagaluarlugu.
