Nunatsinni toqutsinerit ikileriartut
Toqutsisut affaat sinnerlugit hashimik imaluunniit imigassamik sunnertisimasimasarput - ilaatigut tamaasa atugarisarsimallugit. Københavnip Universitetiani instituttimi nakorsat pinerlussimanermik paasiniaavianni nakorsaq ph.d.-nngorniarlu Martin Rune Christensen, ilisimatusartut ilagisaat taama oqarpoq.
Nunatsinnili imigassamik atuineq nalinginnaasumik appariartuinnarsimavoq, toqutsinerillu ikilisimanerannut tamanna peqqutaasinnaasoq ilisimatusartup oqaatigaa.
- Misissuinerit allat takutippaat imigassartorneq toqutsinerit amerlassusaannut attuumassuteqartoq. Kalaallit Nunaannilu imigassartorneq annikilliartortillugu aamma toqutsinerit ikiliartorsimapput, taamaammat attuumassuteqararsinnaapput, Martin Rune Christensen Ritzauimut taama oqarpoq.
Toqutsinerit kamaattoqarneranut aaqqiagiinngissuteqarnernullu allanut atatillugu pinerusarput. Toqutsisimasullu arlallit sooq toqutsisimanerlutik amerlasuutigut eqqaamaneq-ajorpaat. Taamaammat toqutsinerit amerlanersaat sumik tunngaveqarsimanersut ilisimaneqanngilaq.
Toqutsinerit ikiliartoraluartut, toqutsisoqartarnera suli Danmarkimut naleqqiullugu qaffasinnerungaatsiarpoq, Danmarkimimi innuttaasut 100.000-iugaangata toqutsineq ataasiinnaasarmat.
Nunani toqutsiffiunerpaasartuni toqutaasut amerlanersaat angutaasarput, Nunatsinnili toqutaasut affaasa missaat arnaapput, 129-iusunit 58-it arnaammata.
- Nunani toqutsiffiunerpaasartuni toqutsinerit aaqqissuussamik pinerluttuliornermut imaluunniit pinerlunniaqatigiit pinerluttuliornerinut atatillugu pisarput, tassaanerusarlutillu angutit. Aaqqissuussamilli pinerluttuliortoqarneranut atatillugu toqutsisoqartarnera Kalaallit Nunaanni atugaanngilaq, Martin Rune Christensen taama oqarpoq.
1985-imit 2010-mut toqutsinerit amerlassusaat ilisimatuut misissorsimavaat.
