Nunatsinni sulorartartut VM-eriartut
- Oqaannarsinnaavunga assut qilanaarlunga, soorunami assut sukataarumaarpunga. Tulluusimaarnaqateqanngilaq sakiatsinni erfalasorput nuisassasoq sassassalluni, taanna qilanaareqaara.
Kalaallit sulorartartut angutit pingasut arnallu pingasut Kinap kujasissortaanut Nanningimut nunarsuarmi pissartanngorniunnermut peqataajartorlutik marlunngornermi maajip 14-ianni aallarput.
Naak inuussutissarsiutigalugu timersuutiginngikkaluarlugu angusaqarluarusunnerup pianik sungiusarnerit imaaginnavissimapput.
- Proffessionaliunngilagut, saniatigut suliffeqarpugut. Kisianni piffissap ilaani qulingiluariarluta sungiusarnerit angusinnaasarpagut, Jens- Frederik taama oqarpoq.
Nunarsuarmi pissartanngorniunnermi kalaallit marloriarlutik unammissapput, unamminermi ataatsimi tallimariarlutik unammillutik. Tassa angutini ataasiakkaarluni unammineq, arnani ataasiakkaarluni unammineq, angutini iligiiaarluni unammineq, arnani iligiiaarluni unammineq kiisalu arnaq angullu iligiillutik unamminerat.
AAMMA ATUARUK Sulorallammak Danmarkimi efterskolerfimmini pissartanngortoq
Jens- Frederik Nielsenip nunarput sinnerlugu takutitsilluarnissani siunertaraa.
- Ajugaarusussuseqarpunga assut, aamma nunarput nittarsaakkusuppara badmintonertartutut. Taamaammat neriuutigaara, aamma ilimagaara minnerpaamik ataaseriarlunga ajugaasinnaajumaarlunga, Jens- Frederik Nielsen oqarpoq. Taanna nunatsinni timersullammattut siorna toqqagaanikuuvoq.
Nunarsuarmi pissartanngorniunnerit Kinami Nanningimi maajip 19-ianit 26-iata tungaanut ingerlanneqassapput.