Nunatsinni suliffissaaleqisut ikilerialaarsimapput
Suliffissaaleqisut ukiup qaammataani siullerni ikilerialaarsimapput 50-t sinnilaarlugit ikileriaramik.
Nunatsinni suliffissaaleqisut ukioq manna qaammatini siullerni pingasuni 2.811-nik amerlassuseqarput, siorna ukiup taamaalinerani 2.867-iusimallutik. Ikileriaat 52-uvoq. Taannalu kisitsit ukiup ingerlanerani assigiinngitsut peqqutigalugit nikerarsinnaasarpoq.
Kvartalimi siullermi suliffissaaleqisut 2.811-t ima agguataarsimapput, angutit 1.700-ngajaat arnat 600-ngajannik ikinnerusut.
Suliffissaaleqisut amerleriarnerpaasimapput Narsami, 53-inik. Kalaallit Nunaanni Naatsorsueqqissaartarfiup nalunaarutaa malillugu pissutaanerpaavoq, Narsami suliffissuup siorna juulimili matoqqalernera. Maannamullu suliffissuaq ammaqqinneqarsimanngilaq.
Suliffissaaleqinerpaaffiusuni tulliupput Tasiilaq, 31-inik amerleriarfiusimasut pingajuullutik Paamiut 17-inik amerleriarfiusimasut.
Illoqarfiit amerleriarfiusut allat tassaapput Nuuk tallimanik, Aasiaat Ilulissallu tamarmik immikkut pingasunik.
Suliffissaaleqisut ikileriarnerpaasimapput Sisimiuni 50-inik ikileriaramik, tulliullutik Qaanaaq 35-inik ikileriartut, pingajuullutik Qasigiannguit 20-nik ikileriartut.
Qaanaap appariarfiuneranut pissutaanerpaavoq feriepengesiassanik agguaasarneq, tassami suliffissaaleqisut feriepengesinermikkut suliffissarsiortutut inissisimajunnaartarput.
Ikileriarfiusuni tulliupput Qaqortoq 19-inik, Upernavik aqqanilinnik, Ittoqqoortoormiut Qeqertarsuarlu tamarmik immikkut arfineq-pingasunik, Uummannaq arfinilinnik, Nanortalik tallimanik, Kangaatsiaq sisamanik kiisalu Maniitsoq marlunnik.
Ukiut pingasut kingumut qiviaraanni suliffissaaleqisut ukiut qaammataanni siullerni pingasuni ikiliartuinnarsimapput, 2005-imi 3.200-t missaanneeriarlutik, siorna 2.900-ngajanngorsimapput, ukioq mannalu 2.800-ngajanngorlutik.
Nunatsinni inunngorsimasut, 15-iniit 62-inut ukiullit illoqarfinni najugaqartut sulisinnaasutut nalunaarsorneqartarput. Kisitsisit nittartakkami statgreen.gl-imi aamma takuneqarsinnaapput.
