Nunatsinni sanaluttartut qulaajaavigissavai
- Robert Holmenep suliariligassaa tassaavoq, Kalaallit Nunaanni tamarmi sanaluttartut eqqumiitsuliortullu nalunaarsorneqarnissaat suliniarfiginerisalu pitsanngorsarnissaat, GTE-mi inerisaanermut pisortaq Mads-Daniel Skifte taama oqarpoq.
Inerisaanermut immikkoortortaqarfik suleqatigalugu Robert Holmenep kikkut sanaluttartuunersut nalunaarsussavai. Paasiniaanerminilu kommunit suleqatigalugit nunatsinni tamarmi kikkut sanaluttartuunersut sulerisarnersullu nalunaarsussavai.
Suliniarnerup siunertaraa piginnaanngorsaanissaq, nunatsinni eqqumiitsuliortut sanaluttartullu aningaasarsiornerminnik qanoq pitsanngorsaallutillu aqutsisinnaanissaannik ilinniartitsinermik siunertaqartoq.
Eqqumiitsuliornermut tunngasut ineriartortinnerisigut sanaluttartut namminneq atugaat nunattalu karsia iluaquserneqarsinnaassapput.
- Anguniakkat pingaarnersaraat, eqqumiitsuliornermik inuussutissarsiuteqarnerup ataqatigiissarnissaa, ataavartumik pitsaanerusumillu isertitaqarnermik kinguneqartussamik, Mads-Daniel Skifte oqarpoq.
Taamaammat qularinngilaa Robert Holmenep, nammineq sanaluttartuullunilu eqqumiitsuliortuusup, suliassami angisuumi pingaartumilu matumani, GTE ukiuni tullerni ikiorsinnaassagaa.
