Nunatsinni puiseerarniartoqarneq ajorpoq

Aalisarnermut, Piniarnermut Nunalerinermullu Naalakkersuisoqarfimmit taama nalunaarput, taakku kamaatigaat, Danmarkimi aviisip, Informationip, ippassaq allaaserimmagu, Kalaallit Nunaat, nunat allat, Norge, Canada Ruslandilu, assigalugit puisit piararpassuinik piniartartoq.
apriilip 23-at 2009 08:48

Aallaaserisami sammineqarpoq russit ministeriunerata, Vladimir Putinip, Ruslandimi puisit piaraannik piniarneq inerteqqutinngortissimagaa. Putin isumaqarporooq piaqqanik anaartaaginnarluni piniartarneq naalliutsitseqaluni iluanaarniutaaginnartoq, kiisalu Uumassusilinnut Avatangiisinullu ministerip isummani tapersersoraa.Aviisi ilanngullugu allaaserinnippoq, russit taama aalajangersimanerat Kalaallit Nunaannik nunanillu taaneqartunik akerlilersorneqangaaraluarlutik piniariaatsiminnik ingerlatsiinnartuni iliuuseqarfiginninnissamik piumaffiginningaalersoq.

- Kalaallit Nunaanni puiseerarniartoqanngisaannarpoq, aamma anaartaaginnarluni puiseerarniartarneq Kalaallit Nunaanni atorneqanngisaannarsimavoq, Naalakkersuisoqarfimmi Allaffimmi Pisortaq, Jørgen Olsen, allaaserisaq pillugu qisuariarpoq.

Aamma erseqqissaatigaa puisit piaraannik miluttunik Kalaallit Nunaanni piniartoqarneq ajortoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq