Nunatsinni politikkimi suleqatigiit ataasiinnaapput

Inatsisartut ukiaanerani ataatsimiinnerat naammassereersorlu Axel Jerimiassen ilisimatusarfimmi inuiaqatigiilerisoq taama naliliivoq:

Nunatsinni politikkimi suleqatigiit ataasiinnaapput. Naalakkersuisoqatigiit kisiartaallutik ataatsimoorlutik ukiaanerani ataatsimiinnerni taaseqatigiittarput, illuatungiliuttullu siunnersuutigisatik imminnut tunuartittarlugit.

Assersuutigalugu Siumumiit naartuersittarnermik akiliisoqartalernissaanik siunnersuutaasoq Atassutikkormiut akerleralugu tunuartippaat.

- Soorlu partiit ilaat aaqqissuussaanermikkut aalajangersimanerusut, ilaalli aalajangersimannginnerusut takutinneqarpoq, Axel Jerimiassen oqarpoq.

Aningaasaqarnikkut politikkimi akerleriittoqarnera erseqqarippoq. Tamanillu akissussaassuseq taakkartorneqarpoq: Illuatungiliuttut Naalakkersuisoqatigiit aningaasaqarnermut politikkiat akisussaassuseqanngitsumik aqutsisutut uparuarpaat, inuiaqatigiinnut kingunipiloqarnerarlugu.

Illuatungaaniillu Naalakkersuisoqatigiit illuatungiliuttut uparuarpaat aningaasaqarnermut politikkiat akissussaassuseqanngitsumik aqunnerarlugu, aningaasaqarnerlu naammattusaarnerunnginnerarlugu. Taamaattumik sorleq eqqortutut taasariaqarpa?

- Naalakkersuisoqatigiit illuatungiliuttullu pisooqatigiipput, Axel Jerimiassen taama akivoq.

Naalakkersuisoqatigiit atsioqqammiinnartulli suliffissuaq Royal Greenland milliardit koruunit affaat angullugit amigaateqalerpoq:

- Milliardit koruunit affaannik Royal Greenlandimut aningaasaliissuteqarput. Nunatsinnilu pissutsit eqqarsaatigissagaanni taakku aningaasarpassuupput. Taamaattumik taannaannarluunniit eqqarsaatigissagaanni, taava massakkut naalakkersuisoqatigiittut arlaatigut tulleriiaarinermikkut ingerlatsiniaasaartariaqarput, massakkut aningaasatigut inissisimanertik eqqarsaatigalugu, Axel Jerimiassen oqarpoq.

Ilassutigalugu oqaatigaa taamaalisoqarnerata kingunerissagaa akiligassat kinguaariinnut tulliuttunut nammakkiutaanissaat.

Upernaakkut ataatsimiinnermi Naalakkersuisoqatigiit tungaanniit kukkuluttorneqalaanngitsuunngilaq.

IA-p inatsisartuni ilaasortaatitaasa siulittaasuata Olga P. Berthelsenip siunnersuutai arlaqartut kinguartinneqanngikkunik allanngortinneqarput.

Inatsisartuni ilaasortaatitat siulittaasuat partiip iluani qaffasissumik inissisimavoq. Olga P. Berthelsenilu Nalaakkersuisuni allanngortiterisoqassagaluarpat Naalakkersuisuisuni ilaasortanngoriaannaavoq.

- Siunnersuutigisimasaa soorlu taamaaliinnarlugu akuerineqanngitsoorpat, imaassinnaavoq oqaluuserineqarnera amigarsimasoq, imaluunniit siunnersuutip suli annerusumik qulaajarneqarnissaa pissutaatinneqarsimasinnaavoq, Axel Jerimiassen oqarpoq.

Ukiaanerani ataatsimiinnerni politikerit kisermaassillutik ingerlatsisut malunnaqisumik saqqummerput, inuiaqatigiilerisoq taama naliliivoq.