Nunatsinni politiit nersornaammut innersuunneqartut
Danskit inatsisinik atortitsinermut ministeriata pinerlutsaaliuinermik suliniutit pitsaanersaannik marlunngorpat nersornaasiiniarpoq, Kalaallit Nunaannilu Politiit nersornaasigassatut innersuunneqartut ilagaat.
Suliniut "Oqaloqatigiinneq angerlarsimaffimmi perulluliornerit pinaveersaartinniarlugit", Radioaviisip arlaleriarluni sammisarsimasaa, maanna aamma Danmarkimit maluginiarneqarsimavoq. Suliniut taanna aqqutigalugu angerlarsimaffimmi perulluliornerit malunnaatiminnik ikilisinneqarsinnaasimapput aammalu inunnik isumaginnittoqarfimmik suleqateqarnermut nukittorsaataasimalluni.
Angerlarsimaffimmi perulluliortoqarsimatillugu, politiit malitseqartitsillutik aqaguani ilaqutariinnut pineqartunut pulaartarput, sapinngisaminnillu siunnersuillutillu ilitsersuiniartarlutik.
Nunatsinni politiit Pinerlutsaaliuillaqqinnerpaamut Nersornaammik pissarsisinissaminnut Aarhusimi suliniut alla unammillertigaat. Suliniummi tassani Gellerupimi pisuttuaqatigiissitsisoqartarpoq sumiiffiullu nuannersortai oqaluttuarineqartarlutik.
