Nunatsinni pissartanngorniutsitsisarnissat qulakkeerneqartut
Kalaallit Nunaanni Timersoqatigiit Kattuffiannit Arctic Sports Greenlandip kattuffittut akuerineqarluni oktobarip 13-iani 2012-imi ilaasortanngortinneqarpoq, tamatuma kingunerisaanik ukiut tamaasa nunatsinni inuit timersuutaanik pissartanngorniutsitsisalernissaq qulakkeerneqarpoq, taama Arctic Sports Greenland-ip siulittaasuat Helga Nielsen ilisimatitsivoq.
- Massakkut kattuffinngoratta ukiut tamaasa aningaasanik immikkut ukiumut pisartagaqalissaagut. Taava ukiut tamaasa GM-eqartarnissaa qulakkeerneqareerpoq, Helga Nielsen oqarpoq.
Arctic Sports Greenlandip kattuffittut inissisimalernerata kingunerisaasa ilagaat kattuffiup inuit timersuutaanik unammisartuisa siunissami nunanut allanut unammiartornissaanut periarfissaasa amerlineri.
- Qaaqqusissutit tigugutsigit nunanut allanut aallartitaqarsinnaanngorpugut, soorlu Alaskamut qaaqqusissutit tigugaangatsigit sapinngisamik amerlanertigut peqataatitaqartuaannarsinnaalissaagut, Helga Nielsen oqarpoq.
Kattuffik 200-nik ilaasortaqarpoq Ilulissanilu GM-ertitsineq novembarip pingajuaniit novembarip 9-ata tungaanut pissartanngorniortitsilluni unammisitsisoqassalluni. Pissartanngorniutitsinermi timersortartut 64-it peqataassapput.
