Nunatsinni perorsaasut ilisimasaat qaffasinnerulissapput
Perorsaaneq pillugu ilisimaqarfittaap ullumi ammarneqarneranut atatillugu Perorsaanermik ilinniarfiup pisortaata neriuutigaa nunatsinni qallunarnittumik perorsaariaaseq qimakkiartuaarneqarumaartoq:
- Soorunami nunatsinni pissutsit aallaavigalugit taamatut ilisimatusarneq ilisimasanillu katersineq ingerlanneqalerpat qularinngilluinnarpara tamanna aamma siunissami qimakkiartuaarneqarsinnaasoq, Nuka Kleemann oqarpoq.
Nuka Kleemannip neriuutigaa ilisimaqarfiup pilersinneratigut perorsaanermi ilisimasat qaffasinnerulernissaat:
- Siunertaq iluatsissappat soorunami ulluinnarni atuisut, taavalu maani Perorsaanermi Ilinniarfimmi ulluinnarni ilinniartuutigut ilinniartitsisuttalu ilisimasaat qaffasinnerulissapput, tamannalu aamma inuiaqatigiinnut tamanut sunniuteqarumaartoq qularutiginngilara, Nuka Kleemann Perorsaanermi Ilinniarfimmi pisortaq oqarpoq.
Perorsaanermi Ilinniarfimmi ulluinnarni ilinniartitsisut namminneq sammisaminnik perorsaaneq pillugu ilisimasaqarfimmi ingerlatitsinnaapput. Tamatumalu saniatigut Nuka Kleemannip qularutiginngilaa immikkut ilisimasallit immikkut ilisimatusartinneqarsinnaanera.
