Nunatsinni nunanit tamalaaneersut ataatsimeersuariat
Ataatsimeersuarnerni silap pissusaata allanngoriartornera aamma issittumi pinngortitap qanoq illersorneqarsinnaanera nungusaataanngitsumillu piniarneq oqaluuserineqassapput.
Ilisimatusartut atorfillillu nunani issittuni arfineq-pingasuneersut ulluni tulliuttuni qulini siunissami ajornartorsiutaalerumaartussat aaqqiissutissallu oqallisigissavaat.
Ataatsimiinnerit Issittumi Siunnersuisoqatigiit ”Arctic Council”-imik taaguutillit, naalagaaffeqatigiit sinnerlugit nunatta siulittaasuuffigisaata aaqqissuussarai.
Ataatsimiinnermut siullermut Pinngortitaleriffik aamma Avatangiisinut Pinngortitamullu pisortaqarfik qaaqqusisuupput. Ataatsimiinneq ullumikkut aallartittussaavoq februaarillu qulingata tungaanut ingerlanneqassalluni.
Ataatsimiinnermi sammineqassallutik timmissat issittumi imarmiut ilisimatusarfigineqarnerannut killilersorneqarnerannullu tunngasut.
Ilisimatusartut ataatsimiinnissaat tulleq sapaatip akunnerani tullermi aallartissaaq, Avatangiisinut pinngortitamullu pisortaqarfimmit aaqqissuunneqartoq. Ataatsimeeqatigiit taakkua pinngortitami uumassusilinnik nalunaarsuinerup – immikkut pilersaarusiornikkut qanoq suleqatigiissutigineqarsinnaanera sammissavaat. Taamatut suliaqarnikkut issittumi pinngortitaq uumasullu issittumiittut nalunaarsorneqarnissaat siunertaavoq.
